Surya 44 : కోలీవుడ్ స్టార్ హీరో సూర్య తన 44వ చిత్రంతో బిజీగా ఉన్నాడు. కార్తీక్ సుబ్బరాజ్ దర్శకత్వంలో తెరకెక్కుతోన్న ఈ చిత్రాన్ని 2డీ ఎంటర్‌టైన్‌ మెంట్స్, స్టోన్‌బెంచ్ ఫిల్మ్స్ సంయుక్తంగా నిర్మిస్తున్నాయి. బుట్టబొమ్మ పూజా హెగ్డే కథానాయికగానటిస్తోంది.
ఈ చిత్రం మొదటి షెడ్యూల్ కొన్ని వారాల క్రితం అండమాన్‌లో ప్రారంభమై, ఇప్పుడు ముగింపు దశకు చేరుకుంది.
ఈ షెడ్యూల్‌లో భాగంగా, సూర్య మరియు పూజా హెగ్డేపై రెండు పాటలు మరియు సూర్యపై ఒక యాక్షన్ సన్నివేశం చిత్రీకరించబడ్డాయి. ప్రస్తుతం, చిత్రబృందం ప్రధాన తారాగణంపై కీలక సన్నివేశాల చిత్రీకరణను కొనసాగిస్తోంది. ఈ షెడ్యూల్ జులై మొదటి వారాంతానికి పూర్తవుతుందని అంచనా.
రెండవ షెడ్యూల్ జులైలోనే ఊటీలో ప్రారంభించడానికి సన్నాహాలు జరుగుతున్నాయి. ఈ చిత్రం ప్రేమ, యాక్షన్, వినోదాల మేళవింపుతో కూడిన ఆసక్తికరమైన కథతో రూపొందుతోంది. సంతోష్ నారాయణన్ సంగీతం అందిస్తున్నారు.
