TJ Jnanavel : తమిళ సినిమా రంగంలో తనదైన ముద్ర వేసిన దర్శకుడు టి.జె. జ్ఞానవేల్‌ త్వరలోనే మరో ఆసక్తికరమైన చిత్రంతో ప్రేక్షకుల ముందుకు రానున్నారు. ‘జై భీమ్‌’ వంటి సినిమాలతో జాతీయ స్థాయి గుర్తింపు తెచ్చుకున్న ఈ దర్శకుడు.. ఇప్పుడు హిందీలో ‘దోశ కింగ్‌’ అనే చిత్రాన్ని తెరకెక్కించనున్నారు. ఈ సినిమా తమిళనాడులో దోశ కింగ్‌గా పేరు పొందిన శరవణ భవన్‌ హోటల్స్‌ అధినేత రాజగోపాల్‌ జీవితంలోని ఒక సంచలన ఘటన ఆధారంగా రూపొందుతుంది.
రాజగోపాల్‌ తన జాతకం ప్రకారం తన వద్ద పని చేసే అసిస్టెంట్‌ కూతురు జీవన జ్యోతిని తన మూడో భార్యగా చేసుకోవాలని నిర్ణయించుకుంటాడు. కానీ, ఆమెకు ఇప్పటికే శాంతకుమార్‌ అనే వ్యక్తితో వివాహం జరిగి ఉంటుంది. తన కోరికను నెరవేర్చుకోవడానికి శాంతకుమార్‌ను హత్య చేయించాలని రాజగోపాల్‌ పథకం వేస్తాడు. ఈ హత్య కేసు 2001లో వెలుగులోకి వచ్చి అప్పట్లో సంచలనం సృష్టించింది.
ఈ సినిమాలో శాంతకుమర్ భార్య జీవజ్యోతి చేసిన పోరాటాన్ని ప్రధానంగా చూపించనున్నారు. ఈ సినిమాను జంగ్లీ పిక్చర్స్‌ సంస్థ నిర్మిస్తున్నారు. ఈ సినిమా త్వరలోనే పట్టాలెక్కనుండడంతో సినీ ప్రేమికులు ఎంతగానో ఆసక్తిగా ఎదురు చూస్తున్నారు. ఈ సినిమా జ్ఞానవేల్‌ కెరీర్‌లో మరో మైలురాయిగా నిలుస్తుందని అంచనా.
