Vijay Sethupathi : తమిళ సినీ ప్రేక్షకులకు బాగా తెలిసిన పాపులర్ రియాలిటీ షో బిగ్‌బాస్‌. ఈ షోకు ఇప్పటివరకు కమల్ హాసన్ హోస్ట్‌గా వ్యవహరించిన విషయం తెలిసిందే. తన బిజీ షెడ్యూల్ కారణంగా ఆయన ఈ షోకు గుడ్‌బై చెప్పారు. మరి కమల్ హాసన్ తర్వాత బిగ్‌బాస్‌ హోస్ట్‌గా ఎవరు ఉంటారనేది ప్రస్తుతం ప్రధాన చర్చనీయాంశం. తాజాగా వినిపిస్తున్న సమాచారం ప్రకారం మక్కళ్ సెల్వన్ విజయ్ సేతుపతి తమిళ బిగ్‌బాస్‌ కొత్త సీజన్‌కు హోస్ట్‌గా వ్యవహరించనున్నట్లు తెలుస్తోంది. ఈ విషయంపై అధికారిక ప్రకటన రావాల్సి ఉంది.
విజయ్ సేతుపతి ఇప్పటికే సన్ టీవీలో ప్రసారమవుతున్న ‘మాస్టర్‌ చెఫ్‌’తో పాటు మరో కార్యక్రమానికి హోస్ట్‌గా వ్యవహరిస్తున్నారు. నటుడిగా పాటు వ్యాఖ్యాతగానూ తనకంటూ ప్రత్యేక గుర్తింపు తెచ్చుకున్నారు. తమిళ బిగ్‌బాస్‌కు విరామం ప్రకటించిన కమల్ హాసన్ “వరుస చిత్రాలతో తీరికలేనందువల్ల ఈ నిర్ణయం తీసుకోవాల్సి వచ్చింది. ‘బిగ్‌బాస్‌’ షో ద్వారా మీ అందరి ఇళ్లకు రావడం గర్వంగా ఉంది. నాతో పాటు, ఈ షోపై మీరు చూపిన ప్రేమ, అభిమానానికి ధన్యవాదాలు. మీకెప్పటికీ రుణపడి ఉంటా. అంతేకాదు, మీ అభిమాన కంటెస్టెంట్‌లకు మీరందించిన మద్దతు వల్లే భారతీయ టెలివిజన్‌ షోలలో ‘బిగ్‌బాస్‌ తమిళ్‌’ ఉత్తమ రియాల్టీషోగా నిలిచింది” అని అన్నారు.
