Tollywood : మెగాస్టార్ చిరంజీవి నటిస్తున్న 156వ చిత్రం ‘విశ్వంభర’. బింబిసార ఫేమ్ వశిష్ట దీనికి దర్శకుడు. ఈ చిత్రం షూటింగ్‌కి విరామం ఇచ్చి, తాజాగా తిరిగి సెట్‌లోకి చేరిన చిరును కలవడానికి మరో స్టార్ హీరో విక్టరీ వెంకటేశ్ అనూహ్యంగా వచ్చారు. దర్శకుడు అనిల్ రావిపూడితో కలిసి తన సినిమా ‘వెంకీ-అనిల్03’ షూటింగ్‌లో బిజీగా ఉన్నప్పటికీ, తన సన్నిహితుడు చిరును కలవడానికి కొద్దిసేపు సమయం కేటాయించారు.
‘విశ్వంభర’ సెట్స్‌లో వెంకటేశ్, అనిల్ రావిపూడితో పాటు హీరోయిన్లు మీనాక్షి చౌదరి, ఐశ్వర్య రాజేష్‌లు కూడా ఉన్నారు. ఈ నటీనటులు అందరూ కలిసి చిరు, దర్శకుడు వశిష్ఠతో కొంతసేపు ముచ్చటించారు. ఈ సందర్భంగా తీసిన ఫోటోలు సోషల్ మీడియాలో వైరల్ అవుతున్నాయి. ఈ ఫోటోలు చూసిన అభిమానులు ఎంతగానో ఆనందిస్తున్నారు.
ఇక ఈ చిత్రానికి సంబంధించిన మరో ముఖ్యమైన అప్‌డేట్ ఏంటంటే, దసరా కానుకగా ‘విశ్వంభర’ టీజర్ రిలీజ్ కానుంది. చిరు సరికొత్త లుక్‌లో కనిపించబోయే ఈ టీజర్‌పై అభిమానుల్లో భారీ అంచనాలు నెలకొన్నాయి. మరోవైపు, వెంకటేశ్ నటిస్తున్న ‘వెంకీ-అనిల్03’ చిత్రం కూడా మంచి జోష్‌లో సాగుతోంది. ఈ చిత్రం మెజారిటీ షూటింగ్ పూర్తి చేసుకుని, సంక్రాంతి కానుకగా ప్రేక్షకుల ముందుకు రానుంది.
