Varuntej : గోల్డ్ బాక్స్ ఎంటర్టైన్మెంట్స్ ప్రై.లి. బ్యానర్‌లో విష్ణు ప్రసాద్ లగ్గిశెట్టి, మెగాస్టార్ చిరంజీవి తనయ సుస్మిత కొణిదెల నిర్మించిన జీ5 ఒరిజినల్ సిరీస్ ‘పరువు’. ఈ సిరీస్ లో నాగబాబు, నివేదా పేతురాజ్, నరేష్ అగస్త్య, ప్రణీత పట్నాయక్, బిందు మాధవి, అమిత్ తివారి వంటి వారు ప్రముఖ పాత్రలు పోషించారు. ఈ వెబ్ సిరీస్ ప్రీ లాంచ్ ఈవెంట్ గురువారం నాడు ఘనంగా జరిగింది. ఈ కార్యక్రమంలో మొదటి ఎపిసోడ్‌ను ప్రేక్షకులకు చూపించి, వారి అభిప్రాయాలను తెలుసుకున్నారు. ఈ కార్యక్రమానికి హాజరైన మెగా ప్రిన్స్ వరుణ్ తేజ్ మాట్లాడుతూ ఈ వెబ్ సిరీస్ పైలెట్ ఎపిసోడ్ చాలా బాగా నచ్చిందని, తాను తన కుటుంబంతో కలిసి చూశానని తెలిపారు.
థియేటర్ అయినా, ఓటీటీ అయినా మంచి కాన్సెప్ట్‌లతో వస్తే ప్రేక్షకులు ఆదరిస్తారని, ‘పరువు’ వెబ్ సిరీస్ కూడా నేషనల్ వైడ్‌గా అందరినీ ఆకట్టుకుంటుందని అన్నారు. మొదటి ఎపిసోడ్ చాలా ఆసక్తికరంగా ఉండటంతో టైం తెలియలేదని, చాలా త్వరగా ముగిసిపోయిందని వరుణ్ తేజ్ అభిప్రాయపడ్డారు. ఎడిటింగ్, మ్యూజిక్, కెమెరా వర్క్ అద్భుతంగా ఉన్నాయని, సిరీస్ చాలా సహజంగా కనిపించిందని ప్రశంసించారు.
షో రైటర్, డైరెక్టర్లకు, షో రన్నర్ పవన్ సాధినేనికి వరుణ్ తేజ్ అభినందనలు తెలిపారు. నటీనటుల నటన గురించి మాట్లాడుతూ వరుణ్ తేజ్ నరేష్ అగస్త్య, నివేదా పేతురాజ్‌ల నటన చాలా బాగుందని అన్నారు. నరేష్ అగస్త్య విలక్షణ నటుడని, నివేదా ఎప్పుడూ డిఫరెంట్ పాత్రలను ఎంచుకుంటూ వస్తున్నారని ప్రశంసించారు.
