పవన్ కళ్యాణ్ మూడేళ్ళ విరామం తర్వాత కం బ్యాక్ మూవీగా ‘వకీల్ సాబ్’ సినిమాతో వస్తున్న విషయం తెలిసిందే. ఇప్పటికే విడుదలైన సినిమా ట్రైలర్ అభిమానులలో సినిమాపై అంచనాలను పెంచేసింది. కాగా నిర్మాత దిల్ రాజు ఈ సినిమా ప్రీ రిలిజ్ వేడుకను ఏప్రిల్‌ 3వ తేదీన భారీ స్థాయిలో నిర్వహించే ఆలోచనలో ఉన్నారు. కాకపొతే యూసుఫ్‌గూడ పోలీస్‌ లైన్స్‌లోని స్పోర్ట్స్‌ గ్రౌండ్స్‌లో తలపెట్టిన వకీల్‌సాబ్‌ ప్రీ రిలీజ్ ఈవెంట్‌కు జూబ్లీహిల్స్‌ పోలీసులు అనుమతి నిరాకరించారు. సినిమా ప్రీ రిలీజ్ ఫంక్షన్‌ను జె.మీడియా ఫ్యాక్టరీ నిర్వహించాలని తలపెట్టి ఇందుకోసం జూబ్లీహిల్స్‌ పోలీసులకు అనుమతి మంజూరు కోరుతూ లేఖ రాశారు. అయితే కోవిడ్‌–19 విస్తరించే నేపథ్యంలో ఎలాంటి మీటింగ్‌లు, సభలు, సమావేశాలకు అనుమతులు లేవని, వకీల్ సాబ్ సినిమా ప్రీ రిలీజ్ ఫంక్షన్‌కు అనుమతి నిరాకరించినట్లు జూబ్లీహిల్స్‌ ఇన్‌స్పెక్టర్‌ రాజశేఖర్‌రెడ్డి తెలిపారు. ఈ ఈవెంట్‌కు 5 నుంచి 6 వేల మంది హాజరవుతారని నిర్వాహకులు అర్జున్, ప్రశాంత్‌ తమకు ఇచ్చిన లేఖలో పేర్కొనడం జరిగిందని, తాజా జీవో ప్రకారం ఎట్టి పరిస్థితుల్లోనూ అనుమతులు కుదరవని స్పష్టం చేశారు.
