Thuglife : లోకనాయకుడు కమల్‌హాసన్‌ కథానాయకుడిగా, లెజెండరీ దర్శకుడు మణిరత్నం తెరకెక్కిస్తోన్న యాక్షన్ చిత్రం ‘థగ్ లైఫ్’. తమిళనాట పెద్ద అంచనాలతో ఈ సినిమా నిర్మాణం జరుపుకుటోంది. రాజ్‌ కమల్‌ ఫిల్మ్స్‌ ఇంటర్నేషనల్, మద్రాస్‌ టాకీస్, రెడ్‌ జెయింట్‌ మూవీస్‌ సంయుక్తంగా నిర్మిస్తున్న ఈ చిత్రంలో శింబు, త్రిష, జోజు జార్జ్‌ తదితరులు ప్రధాన పాత్రల్లో నటిస్తున్నారు.
ప్రస్తుతం నిర్మాణానంతర దశలో ఉన్న ఈ చిత్రం, ప్రేక్షకుల ముందుకు వచ్చే వేసవి సందర్భంగా విడుదల కానుందని సమాచారం. కోలీవుడ్‌ వర్గాల ప్రకారం, ఈ చిత్రం తమిళ సంవత్సరం ఆరంభాన్ని పురస్కరించుకుని వచ్చే ఏడాది ఏప్రిల్‌ రెండవ వారంలో విడుదల కానుందని, ఏప్రిల్‌ 10వ తేదీని ప్రకటించే అవకాశం ఉన్నట్లు వార్తలు వస్తున్నాయి.
పీరియాడిక్‌ యాక్షన్ డ్రామాగా రూపొందిన ఈ చిత్రంలో, కమల్‌హాసన్‌ మూడు విభిన్న కోణాలతో కూడిన పాత్రలో కనిపించబోతున్నారని ప్రచారం జరుగుతోంది. ఏఆర్‌ రెహమాన్‌ సంగీతం అందించగా, రవి కె. చంద్రన్‌ ఛాయాగ్రహణం నిర్వహిస్తున్నారు.
