Sunil : టాలీవుడ్ లో ఒకప్పుడు స్టార్ కమెడియన్ గా ఒక వెలుగు వెలిగాడు సునీల్. తర్వాత హీరోగా మారినా.. ఆశించినంతగా విజయం సాధించలేక పోయాడు. దాంతో ఇప్పుడు విలన్ గానూ, కమెడియన్ గానూ, కేరక్టర్ ఆర్టిస్ట్ గానూ టర్న్ అయ్యాడు సునీల్. ఇప్పుడు సునీల్ నటించని భాష లేదు. తెలుగుతో పాటు తమిళ, మలయాళ భాషల్లో సైతం సునీల్ నటిస్తూ దూసుకుపోతున్నాడు.
అధిక్ రవిచంద్రన్ దర్శకత్వం వహిస్తున్న అజిత్ ‘గుడ్ బ్యాడ్ అగ్లీ’ సినిమాలో సునీల్ ఇప్పుడు ముఖ్యపాత్ర చేస్తున్నాడు. త్వరలోనే అధికారిక ప్రకటన వెలువడే అవకాశం ఉంది. ఇటీవల మమ్ముట్టి మలయాళ చిత్రం టర్బోలో కనిపించిన సునీల్ వివిధ భాషా చిత్రాలలో అత్యంత డిమాండ్ ఉన్న హాస్యనటుడిగా మారుతున్నాడని పరిశీలకులు గుర్తించారు.
తెలుగు సినిమాలతో పాటు రజనీకాంత్ జైలర్, విశాల్ మార్క్ ఆంటోనీ, కార్తీ జపాన్, ఇంకా శివకార్తికేయన్ మావీరన్ వంటి అనేక ప్రముఖ తమిళ చిత్రాలలో సునీల్ నటించాడు. ఈ చిత్రాలు తెలుగులో కూడా విడుదలయ్యాయి, దాంతో సునీల్ సౌత్ ఆడియన్స్ కు బాగా దగ్గరయ్యాడు. ఈ కారణంగానే సునీల్ ఇప్పుడు ఇతర పరిశ్రమల్లోనూ బిజీ అవుతున్నట్లు తెలుస్తోంది.
ప్రస్తుతం అల్లు అర్జున్ పుష్ప 2, రామ్ చరణ్ గేమ్ ఛేంజర్ , ఇంకా ఈ వారం విడుదలైన హరోం హరలో విభిన్న పాత్రల్లో అదరగొట్టాడు సునీల్ ఇప్పుడు తెలుగులో అదిరిపోయే సినిమాల లైనప్‌ను కలిగి ఉన్నాడు. ఈ సినిమాల్లో సునీల్ తన బహుముఖ ప్రజ్ఞను ఎలా ప్రదర్శిస్తాడో చూడాలని ప్రేక్షకులు ఆసక్తిగా ఎదురుచూస్తున్నారు.
