NBK 109 : తెలుగు చలనచిత్ర పరిశ్రమలో నటసింహం నందమూరి బాలకృష్ణకు ఎంతటి ప్రాధాన్యత ఉందో ప్రత్యేకంగా చెప్పనక్కర్లేదు. ఆయన టాలీవుడ్ లోకి అడుగుపెట్టి 50 ఏళ్ళు పూర్తయ్యాయి. ఈ సందర్భంగా అభిమానులు ఉత్సాహంగా వేడుకలు చేసుకుంటున్నారు. ఈ నేపథ్యంలో బాలకృష్ణ తో ప్రస్తుతం సినిమా చేస్తున్న సితార ఎంటర్టైన్‌మెంట్స్ కూడా ఆయనకు శుభాకాంక్షలు తెలియజేసింది.
సితార ఎంటర్టైన్‌మెంట్స్ తన అధికారిక సోషల్ మీడియా ఖాతాలో పోస్ట్ చేసిన ఈ శుభాకాంక్షలు ప్రస్తుతం సోషల్ మీడియాలో వైరల్‌గా మారుతున్నాయి. “కొంతమంది రూల్ చెయ్యాలంటే కిరీటం కావాలి, కానీ బాలయ్యకి తన చిరు నవ్వు చాలు” అంటూ గాడ్ ఆఫ్ మాసెస్ బాలయ్య గారికి ఇండస్ట్రీలో 50 ఏళ్ళు పూర్తి చేసుకున్నందుకు గాను తమ NBK 109 టీం నిండు మనస్సుతో శుభాకాంక్షలు తెలియజేస్తున్నామని పేర్కొంది.
బాలకృష్ణ తన 50 ఏళ్ల సినీ జీవితంలో అనేక రకాల పాత్రలను పోషించి, ప్రేక్షకులను అలరించారు. ఆయన నటన, డైలాగ్ డెలివరీ, స్క్రీన్ ప్రజెన్స్‌కు టాలీవుడ్‌లో ఎంతటి క్రేజ్ ఉందో తెలిసిందే. ఈ సందర్భంగా ఆయనకి అభిమానులు, సినీ ప్రముఖులు అందరూ శుభాకాంక్షలు తెలుపుతున్నారు.
