Tollywood : ‘డీజే టిల్లు’, ‘టిల్లు స్క్వేర్‌’ వంటి సినిమాలతో తెలుగు సినీ ప్రేక్షకులను అలరించిన హీరో సిద్ధు జొన్నలగడ్డకు డిమాండ్‌ పెరిగిపోయింది. ఈ విజయాలతో ఆయనతో సినిమా చేయాలని దర్శకులు ఎంతగానో ఆసక్తి చూపుతున్నారు. ప్రస్తుతం సిద్ధు.. ‘జాక్‌’, ‘తెలుసు కదా’ వంటి చిత్రాలతో బిజీగా ఉన్నాడు. ఇక ‘కోహినూర్‌’, ‘టిల్లు క్యూబ్‌’ వంటి సినిమాలను కూడా పూర్తి చేయాల్సి ఉంది.
ఈ నేపథ్యంలో సిద్ధు జొన్నలగడ్డ వద్దకు మరో కొత్త ఆఫర్‌ వచ్చినట్లు తెలుస్తోంది.
‘గీత గోవిందం’, ‘సర్కారు వారి పాట’ వంటి సూపర్‌హిట్‌ చిత్రాలను తెరకెక్కించిన దర్శకుడు పరశురామ్.. సిద్ధుతో కలిసి సినిమా చేయాలని భావిస్తున్నట్లు సమాచారం. ఇప్పటికే ఈ విషయమై ఇద్దరి మధ్య చర్చలు జరిగినట్లు తెలిసింది. అన్నీ అనుకున్నట్లు జరిగితే దిల్‌రాజు నిర్మాణ సంస్థలో ఈ చిత్రం పట్టాలెక్కే అవకాశం ఉంది. మరికొద్ది రోజుల్లో ఈ ప్రాజెక్ట్‌ గురించి అధికారిక ప్రకటన రానున్నట్లు సినీ వర్గాల్లో ప్రచారం జరుగుతోంది.
