Sandeepkishan : యంగ్ హీరో సందీప్ కిషన్ నటించబోతున్న కొత్త చిత్రం బుధవారం హైదరాబాద్‌లో ఘనంగా ప్రారంభమైంది. త్రినాథరావు నక్కిన దర్శకత్వం వహించబోతున్న ఈ చిత్రాన్ని ఏకే ఎంటర్‌టైన్‌మెంట్స్, జీ స్టూడియోస్ సంయుక్తంగా నిర్మిస్తున్నాయి. హాస్య చిత్రాల నిర్మాణ సంస్థగా పేరుగాంచిన హాస్య మూవీస్ పతాకంపై రాజేశ్‌ దండా ఈ చిత్రానికి నిర్మాతగా వ్యవహరిస్తున్నారు.
ప్రేమ, భావోద్వేగాలతో కూడిన ఓ కుటుంబ కథతో ఈ చిత్రం రూపొందుతోందని సినీ వర్గాలు తెలిపాయి. సందీప్ కిషన్‌ని ఓ కొత్త అవతారంలో చూపించనున్న ఈ చిత్రంలో ఆయన పాత్ర చాలా వైవిధ్యంగా ఉండబోతోందని చిత్రబృందం వెల్లడించింది. రావు రమేశ్‌ ఈ చిత్రంలో కీలక పాత్ర పోషిస్తున్నారు.
ప్రముఖ రచయిత ప్రసన్నకుమార్‌ బెజవాడ ఈ చిత్రానికి కథ, కథనం, సంభాషణలు అందిస్తున్నారు. లియోన్‌ జేమ్స్ సంగీతం, నిజార్‌ షఫీ ఛాయాగ్రహణం ఈ చిత్రానికి అందిస్తున్నారు. సందీప్ కిషన్ గత చిత్రం ‘ఊరుపేరు భైరవకోన’ మంచి విజయం సాధించడంతో ఈ చిత్రంపై కూడా భారీ అంచనాలు నెలకొన్నాయి.
