Race 4 : బాలీవుడ్‌లో ఎప్పటికప్పుడు హాట్ టాపిక్‌గా నిలిచే ఫ్రాంచైజీల్లో ‘రేస్’ ఒకటి. తొలి రెండు భాగాల్లో సైఫ్ అలీఖాన్ హీరోగా నటించి ప్రేక్షకులను అలరించిన ఈ సిరీస్‌కి నాలుగో భాగం రాబోతున్నట్లు ఎప్పటి నుంచో వార్తలు వినిపిస్తున్నాయి. లేటెస్ట్ గా దీనిపై నిర్మాత రమేష్ తౌరానీ స్పందిస్తూ, “సైఫ్ అలీఖాన్ మళ్లీ రేస్ ఫ్రాంచైజీలోకి రావడం చాలా సంతోషంగా ఉంది. మొదటి రెండు భాగాల్లో ఆయనే నటించి ప్రేక్షకుల్ని ఎంత‌గానే ఆక‌ట్టుకున్నారు. ప్రస్తుతం ద‌ర్శకుడు, ఇత‌ర న‌టీన‌టులు, సాంకేతిక నిపుణుల్ని క‌న్ఫమ్ చేసే ప‌నిలో ఉన్నాం. వ‌చ్చే ఏడాది షూటింగ్ ప్రారంభించి..అధికారికంగా అన్ని వివ‌రాలు తెలియ‌జేస్తాం” అని తెలిపారు.
సైఫ్ అలీఖాన్ తాజాగా నటించిన ‘దేవర’ చిత్రంలో భైరా పాత్రలో మెప్పించిన సంగతి తెలిసిందే. ఎన్టీఆర్‌తో సమానంగా ఈ పాత్రను హైలైట్ చేయడంతో సైఫ్‌కి పాన్ ఇండియా స్టార్‌గా మరోసారి గుర్తింపు లభించింది. ‘దేవర-2’లో కూడా ఈ పాత్ర మరింత సంచలనంగా ఉంటుందని అంచనాలు వ్యక్తమవుతున్నాయి. ఈ నేపథ్యంలో ‘రేస్-4’లో సైఫ్ అలీఖాన్ ఖరారవడం చాలా ఆసక్తికరంగా మారింది. ‘దేవర’ సినిమా సైఫ్‌కి తెచ్చిపెట్టిన క్రేజ్‌ను దృష్టిలో ఉంచుకుని, ‘రేస్-4’ని కూడా పాన్ ఇండియా లెవెల్‌లో ప్రచారం చేసే అవకాశం ఉంది. ఇప్పటికే ‘ధైమ్-4’ కూడా రెడీ అవుతుంది. రణబీర్ కపూర్ హీరోగా దీన్ని తెరకెక్కిస్తున్నారు.
