ఎనర్జిటిక్ స్టార్ రామ్ కెరీర్ ను మలుపుతిప్పిన చిత్రం ‘రెడీ’. శ్రీను వైట్ల దర్శకత్వంలో శ్రీ స్రవంతి మూవీస్ బ్యానర్ పై రవికిశోర్ నిర్మించిన ఈ సినిమా 2008, జూన్ 19న విడుదలై.. ఘన విజయం సాధించింది. నేటికి సరిగ్గా 12 ఏళ్ళు పూర్తి చేసుకున్న ఈ సినిమాలో కథానాయికగా జెనీలియా డిజౌజా నటించగా.. నాజర్, కోట శ్రీనివాసరావు, సునీల్, జయప్రకాశ్ రెడ్డి, సురేఖా వాణి, మాస్టర్ భరత్, భరత్ , షఫీ, తనికెళ్ళ భరణి, చంద్రమోహన్, సుధ.. తదితరులు ఇతర ముఖ్యపాత్రలు పోషించారు. ఇంకా తమన్నా, నవదీప్ అతిథిపాత్రల్లో కనిపిస్తారు. ప్రేమించిన అమ్మాయి పూజా (జెనీలియా) కోసం బద్ధశత్రువులుగా మారిన ఇద్దరు అన్నదమ్ముల్ని కలిపి తన ప్రేమను గెలిపించుకుంటాడు చందు (రామ్ ) అనే కుర్రోడు. ఈ క్రమంలో జరిగే సంఘటనలు ప్రేక్షకుల్ని కడుపుబ్బా నవ్విస్తాయి. ఈ సినిమా నుంచే శ్రీను వైట్లకి కామెడీ ఎంటర్ టైన్ టైనర్స్ స్పెషలిస్ట్ గా పేరొచ్చింది. కేవలం రూ. 8కోట్ల బడ్జెట్ తో నిర్మించిన ఈ సినిమా దాదాపు రూ. 12కోట్ల మేరకు కలెక్షన్స్ రాబట్టి.. బ్లాక్ బస్టర్ గా నిలిచింది. దేవీ శ్రీ ప్రసాద్ సంగీతం అందించిన ఈ సినిమాలోని పాటలు అప్పటి ప్రేక్షకుల్ని ఎంతగానో అలరించాయి.
