మాస్ చిత్రాలకు కేరాఫ్ అడ్రెస్ .. యాక్షన్ ఎంటర్ టైనర్స్ కు అసలు సిసలు చిరునామా రవితేజ. ‘డిస్కోరాజా’ తర్వాత రవితేజ మరో సినిమా ఇంతవరకూ విడుదల కాలేదు. ప్రస్తుతం గోపీచంద్ మలినేని దర్శకత్వంలో ‘క్రాక్’ అనే కాప్ చిత్రంలో నటిస్తున్నాడు రవితేజ. ఇన్వెస్టిగేటివ్ థ్రిల్లర్ గా , రవితేజ తరహా యాక్షన్ కు , అగ్రెసివ్ నెస్ కు బాగా స్కోపున్న ఈ సినిమా తర్వాత రవితేజ .. రమేశ్ వర్మ దర్శకత్వంలో ఓ సినిమాకి కమిట్ మెంట్ ఇచ్చాడు. గతంలో ఈ దర్శకుడు రవితేజ తో ‘వీర’ అనే చిత్రం చేశాడు. కానీ ఆ సినిమా అంతగా ఆడలేదు. ఇక ఈ సినిమాకి సంబంధించిన ప్రీప్రొడక్షన్‌ పనులు కూడా జరుగుతున్నాయని సమాచారం.
ఆ మధ్య ఈ సినిమా ఆగిపోయిందంటూ వార్తలు కూడా వచ్చాయి. అయితే చిత్రబృందం మాత్రం ఈ వార్తలను కొట్టివేసింది. ఇందులో రవితేజ ద్విపాత్రాభినయం చేయనున్నాడు. సినిమాకి ‘ఖిలాడి’ అనే పేరును ఖరారు చేసినట్లు సమాచారం. రవితేజ అంటేనే మాస్ మహరాజ్‌. అలాంటి నటుడికి ఇలాంటి పేరే బాగుంటుందని కొందరు సినీ అభిమానులు అభిప్రాయ పడుతున్నారు. లాక్‌డౌన్‌ పూర్తికాగానే సినిమాకు సంబంధించిన మరిన్ని వివరాలు తెలిసే అవకాశం ఉంటుంది.
