ప్రస్తుతం తెలుగు సినీ ఇండస్ట్రీలో ఉన్న స్టార్ హీరోయిన్లలో రష్మిక మందన్నా ఒకరు. చేసింది చాలా తక్కువ సినిమాలే అయినా.. ఛ‌లో, గీతా గోవిందం, స‌రిలేరు నీకెవ్వ‌రు చిత్రాల‌లో అద్భుతమైన నటన, ఆకట్టుకునే అందంతో ఎనలేని గుర్తింపును సంపాదించుకుందీ భామ. అందుకే వరుసగా ఆఫర్లు అందుకుంటూ సత్తా చాటుతోంది. ప్రస్తుతం రష్మిక మందన్నా చేతి నిండా సినిమాలతో ఫుల్ బిజీగా గడుపుతోంది. ఇప్పటికే తెలుగులో అల్లు అర్జున్ నటిస్తోన్న ‘పుష్ప’లో హీరోయిన్‌గా చేస్తోన్న ఆమె.. శర్వానంద్ హీరోగా రాబోతున్న ‘ఆడవాళ్లు మీకు జోహార్లు’ అనే చిత్రాన్నీ చేస్తోంది. ఈ క్రమంలోనే ‘మిష‌న్ మ‌జ్ను’తో బాలీవుడ్‌లోకి సైతం అడుగు పెట్టేసింది. ‘మిష‌న్ మ‌జ్ను’ చిత్రంలో ఫీమేల్ లీడ్ రోల్ కాగా బాలీవుడ్ న‌టుడు సిద్ధార్థ్ మ‌ల్హోత్రా లీడ్‌రోల్ పోషిస్తున్నాడు.
ఇక త‌మిళంలో సుల్తాన్ చిత్రంతో అడుగుపెట్టిన రష్మిక .. కార్తీ స‌ర‌స‌న క‌థానాయిక‌గా న‌టిస్తుంది. ఇందులో రష్మిక ప‌ల్లెటూరి యువ‌తి పాత్ర‌లో క‌నిపించ‌నుండగా, తాజాగా సినిమాకు సంబంధించిన వీడియో షేర్ చేసింది. ఇందులో వ్య‌వ‌సాయం చేస్తున్న రష్మిక పొలాన్ని దున్నుతున్న‌ట్టు క‌నిపిస్తుంది. ఈ వీడియో ప్రస్తుతం సోష‌ల్ మీడియాలో బాగా వైరల్ గా మారింది. బ‌క్కియ‌రాజ్ క‌ణ్ణన్ ద‌ర్శక‌త్వంలో రూపొందుతోన్న యాక్షన్ ఎంట‌ర్‌టైన‌ర్ ‘సుల్తాన్’ చిత్రాన్ని డ్రీమ్ వారియ‌ర్ పిక్చర్స్ బ్యాన‌ర్‌పై య‌స్‌.ఆర్‌. ప్రకాష్ బాబు, య‌స్‌.ఆర్‌. ప్రభు ఈ చిత్రాన్ని నిర్మిస్తున్నారు. ఏప్రిల్ 2న ‘సుల్తాన్’ను విడుద‌ల చేయ‌డానికి స‌న్నాహాలు జ‌రుగుతున్నాయి.
