Tollywood : ప్రియదర్శి హీరోగా , శివలెంక కృష్ణప్రసాద్ నిర్మాణంలో, మోహనకృష్ణ ఇంద్రగంటి దర్శకత్వంలో తెరకెక్కుతున్న చిత్రం “సారంగపాణి జాతకం”. తన నమ్మకాలకు, ప్రేమకు మధ్య చిక్కుకుపోయిన ఈ యువకుడు ఎలాంటి సంఘర్షణను ఎదుర్కొంటాడు అనేది కథాంశం. నమ్మకాలు మనిషికి బలాన్నిస్తాయని, కానీ అవి మూఢనమ్మకాలుగా మారినప్పుడు ఎలాంటి పరిణామాలు ఉంటాయో ఈ చిత్రంలో చూపించారు. రూప కొడువాయూర్ హీరోయిన్‌గా నటించారు.
నరేశ్‌ విజయకృష్ణ, తనికెళ్ల భరణి, శ్రీనివాస్‌ అవసరాల, వెన్నెల కిశోర్, వైవా హర్ష, శివన్నారాయణ వంటి ప్రముఖ నటులు ఇతర కీలక పాత్రల్లో నటించారు. వివేక్‌ సాగర్ సంగీతం అందిస్తున్నారు. ప్రియదర్శి పుట్టినరోజు సందర్భంగా ఈ చిత్రం టైటిల్ ను ప్రకటించారు. చిత్రీకరణ దాదాపు పూర్తయింది. సెప్టెంబరు 5 వరకు రెండు పాటలు, కొన్ని సన్నివేశాల చిత్రీకరణ జరగనుంది.
ఒకవైపు తన నమ్మకాలు, మరోవైపు తను ఇష్టపడిన అమ్మాయి ప్రేమ మధ్య కొట్టుమిట్టాడిన ఓ యువకుడి కథే ఈ చిత్రం. నమ్మకం మనిషికి బలాన్నిస్తుంది. కానీ, మూఢ నమ్మకం బుద్ధిమంతుడిని కూడా బలహీనుడిని చేసి నవ్వుల పాలు చేస్తుంది. అలా నవ్వులపాలైన ఓ మధ్య తరగతి మంచి అబ్బాయి ప్రయాణాన్ని హాస్యం, ఉత్కంఠత మేళవింపుతో తెరపై ఆవిష్కరిస్తున్నాం. హీరో పాత్రలో భావోద్వేగాల్ని, వినోదాన్ని ప్రియదర్శి తనదైన శైలిలో పండిస్తున్నారు. అచ్చతెలుగమ్మాయి రూప తన అభినయంతో కట్టిపడేస్తుంది అని దర్శకుడు మోహనకృష్ణ ఇంద్రగంటి తెలిపారు. ఆద్యంతం నవ్వించే ఓ మంచి చిత్రం. మోహనకృష్ణ ఇంద్రగంటితో ‘జెంటిల్‌మేన్‌’, ‘సమ్మోహనం’ తర్వాత చేస్తున్న చిత్రమిది. ఇప్పటికే 90 శాతం చిత్రీకరణని హైదరాబాద్, రామోజీ ఫిలింసిటీ, విశాఖలో పూర్తి చేశాం అని నిర్మాత శివలెంక కృష్ణప్రసాద్ తెలిపారు.
