L2 Empuran : 2019లో విడుదలైన మలయాళం బ్లాక్‌బస్టర్ మూవీ ‘లూసిఫర్’. దాదాపు 5 ఏళ్ళ తర్వాత ఇప్పుడు ఈ సినిమాకి సీక్వెల్ రాబోతోంది. సినిమా పేరు ‘యల్2 : ఎంపురాన్’. ముఖ్య పాత్రలో మోహన్‌లాల్ నటించిన ఈ సీక్వెల్ ప్రస్తుతం పాన్-ఇండియన్ ప్రాజెక్ట్‌గా బహుభాషల్లో విడుదల కాబోతోంది. లైకా ప్రొడక్షన్స్ నిర్మిస్తోన్న ఈ చిత్రాన్ని మలయాళం టాప్ స్టార్ పృథ్వీరాజ్ సుకుమారన్ దర్శకత్వం వహిస్తున్నారు. దర్శకత్వం వహించడంతో పాటు, ఆయన జావేద్ మసూద్ అనే కీలక పాత్రను కూడా పోషిస్తున్నారు.
పృథ్వీరాజ్ సుకుమారన్ పుట్టిన రోజు సందర్భంగా మోహన్‌లాల్.. జావేద్ మసూద్ పాత్ర ఫస్ట్ లుక్‌ను విడుదల చేశారు. “ఎంపరర్ జనరల్”గా జావేద్ మసూద్ అగ్రెసివ్ లుక్ ను హైలైట్ చేసే ఈ పోస్టర్ అభిమానులను ఆకట్టుకుంటోంది. మోహన్‌లాల్, పృథ్వీరాజ్, టోవినో థామస్, మంజు వారియర్, నందు, సానియా ఇయప్పన్‌తో సహా భారీ నటీనటులు ఈ చిత్రంలో ఉన్నారు. వీరందరూ మొదటి భాగం నుండి తమ పాత్రలను రిపీట్ చేస్తున్నారు. ఈ చిత్రం 2025లో మలయాళం, తెలుగు, తమిళం, కన్నడం, హిందీ భాషల్లో విడుదల కానుంది. మరి ఎంపురాన్ గా మోహన్ లాల్.. ఇంకే రేంజ్ లో అలరిస్తారో చూడాలి.
