బుల్లి తెరపై సక్సెస్ ఫుల్ యాంకర్ గా, టాలీవుడ్ లో యువ హీరోగా తనకంటూ ప్రత్యేక గుర్తింపు తెచ్చుకున్న ప్రదీప్ మాచిరాజు ఇప్పుడు తన రెండవ చిత్రంతో ప్రేక్షకులను అలరించడానికి సిద్ధమవుతున్నారు. మొదటి చిత్రం ’30 రోజుల్లో ప్రేమించడం ఎలా’ తో బ్లాక్ బస్టర్ హిట్ అందుకున్న ప్రదీప్, తన రెండవ చిత్రంతో కూడా అదే జోరును కొనసాగించాలని భావిస్తున్నారు.
ఈ సినిమాకు ‘అక్కడ అమ్మాయి ఇక్కడ అబ్బాయి’ అనే ఆకర్షణీయమైన పేరు పెట్టారు. పవర్ స్టార్ పవన్ కళ్యాణ్ డెబ్యూ మూవీకి కూడా ఇదే టైటిల్ అన్న సంగతి తెలిసిందే. తాజాగా విడుదలైన ఫస్ట్ లుక్ , మోషన్ పోస్టర్ ఈ చిత్రంపై మరింత ఆసక్తిని రేకెత్తిస్తున్నాయి. ఫస్ట్ లుక్‌లో ప్రదీప్ అండ్ హీరోయిన్ దీపికా పిల్లి కళ్లలోకి చూస్తూ చాలా రొమాంటిక్‌గా కనిపిస్తున్నారు. గ్రీన్ బ్యాక్‌డ్రాప్‌లో ఈ జంట చాలా అందంగా కనిపిస్తోంది.
ఈ చిత్రంలో ప్రదీప్ ఒక సివిల్ ఇంజనీర్‌గా నటిస్తున్నారు. తన పని నిమిత్తం ఒక గ్రామానికి వెళ్లి అక్కడ ఒక అమ్మాయితో ప్రేమలో పడతాడు. ఇద్దరి మధ్య జరిగే రొమాంటిక్ కథే ఈ చిత్రం. చిత్రంలో ఎన్నో హాస్య దృశ్యాలు, ఊహించని మలుపులు ఉంటాయని చిత్ర యూనిట్ తెలిపింది. ఈ చిత్రాన్ని యంగ్ టాలెంటెడ్ డైరెక్టర్స్ డ్యుయో నితిన్ అండ్ భరత్ దర్శకత్వం వహిస్తున్నారు. మాంక్స్ & మంకీస్ ఈ చిత్రాన్ని నిర్మిస్తున్నారు.
