Rajasaab : టాలీవుడ్ స్టార్ హీరో ప్రభాస్‌ నటిస్తున్న లేటెస్ట్ మూవీ ‘రాజా సాబ్’. మారుతి దర్శకత్వంలో తెరకెక్కుతున్న ఈ చిత్రం ప్రేక్షకుల్లో భారీ అంచనాలను రేకెత్తిస్తోంది. తాజాగా ప్రభాస్‌ పుట్టినరోజు సందర్భంగా చిత్ర యూనిట్ విడుదల చేసిన మోషన్ పోస్టర్ అందరినీ ఆశ్చర్యపరుస్తోంది. ఇప్పటివరకు యాక్షన్ హీరోగా, రొమాంటిక్ హీరోగా ప్రేక్షకులను అలరించిన ప్రభాస్‌, ‘రాజా సాబ్’లో పూర్తిగా భిన్నమైన పాత్రలో కనిపించనున్నాడు. సింహాసనంపై కూర్చొని సిగార్‌ కాలుస్తూ, మరోవైపు వయసు మళ్లిన లుక్‌తో ప్రభాస్‌ కొత్త అవతారంలో కనిపించడం విశేషం. ఇప్పటికే విడుదలైన గ్లింప్స్‌లో రొమాంటిక్ యువకుడిగా కనిపించిన ప్రభాస్‌, మోషన్ పోస్టర్‌లో రాజుగా మారి ఆకట్టుకున్నాడు.
డైరెక్టర్ మారుతి ఈ చిత్రాన్ని హారర్ రొమాంటిక్ కామెడీగా తెరకెక్కిస్తున్నారు. మోషన్ పోస్టర్ చివరలో ‘హారర్ ఈజ్ ది న్యూ హ్యూమర్’ అంటూ ఇచ్చిన హింట్, ఈ చిత్రంలో హారర్ ఎలిమెంట్స్ ఎంతటి ప్రాధాన్యత కలిగి ఉన్నాయో తెలియజేస్తుంది. ప్రభాస్‌ ఓల్డ్ గెటప్ అసలు సిసలు ‘రాజా సాబ్’ అని చిత్ర యూనిట్ తెలిపింది. ప్రభాస్‌కి జోడీగా మాళవిక మోహనన్‌, నిధి అగర్వాల్‌ నటిస్తున్నారు. బాలీవుడ్ సీనియర్ నటుడు సంజయ్ దత్‌ కీలక పాత్రలో నటిస్తున్నారు. తమన్‌ ఈ చిత్రానికి సంగీతాన్ని అందిస్తున్నారు. పీపుల్ మీడియా ఫ్యాక్టరీ బ్యానర్‌పై టీజీ విశ్వప్రసాద్‌ నిర్మిస్తున్న ఈ చిత్రం వచ్చే ఏడాది ఏప్రిల్ 10న విడుదల కానుంది.
