Mythri Ravishankar : పుష్ప 2 సినిమాలోని అత్యంత ప్రత్యేకమైన ఎపిసోడ్‌గా జాతర సన్నివేశం నిలుస్తుందని నిర్మాతలు తెలిపారు. ఈ సన్నివేశానికి భారీ బడ్జెట్ కేటాయించినట్లు మైత్రీ మూవీ మేకర్స్‌లో ఒకరైన రవిశంకర్‌ వెల్లడించారు. “జాతర సన్నివేశం సినిమాకు హైలైట్‌గా నిలుస్తుంది. దీన్ని మాస్టర్‌పీస్‌లా రూపొందించాము. ఈ సన్నివేశం కోసం చాలా కష్టపడ్డాము.
దాదాపు 35 రోజులు షూటింగ్ జరిపితే, 10-15 రోజులు రిహార్సల్స్ జరిగాయి. అల్లు అర్జున్‌ ఈ సన్నివేశం కోసం చాలా కష్టపడ్డారు. రోజంతా మేకప్‌ వేసుకుని, చీర కట్టుకుని సెట్‌లో కూర్చునేవారు. ఆయన పడిన కష్టానికి ‘పుష్ప 2’ పెద్ద హిట్ కావాలి” అని రవిశంకర్‌ అన్నారు. ఈ సన్నివేశానికి ఎంత ఖర్చు చేశారన్న ప్రశ్నకు సమాధానమిస్తూ, “ఈ సన్నివేశానికి బాగానే ఖర్చు పెట్టాము. కానీ అనవసరంగా డబ్బు ఖర్చు చేయలేదు” అని చెప్పారు. ఇక ‘పుష్ప 2’లో ఐటెం సాంగ్‌లో శ్రద్ధా కపూర్‌ నటిస్తుందనే ప్రచారం జరుగుతుంది. ఈ విషయంపై స్పందిస్తూ, రవిశంకర్‌, “ఐటెం సాంగ్‌లో నటిస్తున్నది ఎవరో రెండు రోజుల్లో తెలుస్తుంది. నవంబర్‌ 4 నుంచి ఈ పాట షూటింగ్ ప్రారంభం అవుతుంది” అని తెలిపారు.
