Tollywood : కోస్టారిక దేశం తెలుగు సినిమా పరిశ్రమతో భాగస్వామ్యం పెంచుకోవడానికి ఆసక్తి చూపుతోంది. ఈ మేరకు కోస్టా రిక దేశ అధికార ప్రతినిధి శ్రీమతి సోఫియా తెలుగు ఫిల్మ్ ఛాంబర్ మరియు నిర్మాతల మండలి ప్రతినిధులను కలిసి విస్తృతంగా చర్చించారు. తెలుగు ఫిల్మ్ ఛాంబర్ సెక్రెటరీ దాము, నిర్మాతల మండలి సెక్రెటరీ తుమ్మల ప్రసన్న కుమార్‌లను మర్యాద పూర్వకంగా కలిశారు. వారితో పాటు ప్రముఖ నిర్మాతలు చదలవాడ శ్రీనివాసరావు, రామ్ సత్యనారాయణ లను కూడా ఆమె కలిశారు.
కోస్టారిక తన అద్భుతమైన ప్రకృతి దృశ్యాలకు ప్రసిద్ధి. పచ్చని అడవులు, అద్భుతమైన జలపాతాలు, బీచ్‌లు సినిమాల్లో అద్భుతమైన నేపథ్యాలను అందిస్తాయి. సినిమా షూటింగ్‌లకు అన్ని రకాల సహకారం అందిస్తోంది. సింగిల్ విండో విధానంలో అనుమతులు ఇవ్వడం ద్వారా నిర్మాతలకు సమయం ఆదా అవుతుంది.
కోస్టారికలో షూటింగ్ చేసే సినిమాలకు పన్ను రాయితీలు కూడా అందిస్తున్నారు. ఇది నిర్మాతలకు ఆర్థికంగా లాభదాయకంగా ఉంటుంది. తెలుగు సినిమాల్లో కొత్త ప్రదేశాలను చూపించాలనే ఆసక్తి ఎల్లప్పుడూ ఉంటుంది. కోస్టా రిక ఇందుకు అనువైన ప్రదేశం. కోస్టా రికలో షూటింగ్ చేసిన సినిమాలు అంతర్జాతీయ ప్రేక్షకులను ఆకర్షించే అవకాశం ఉంది. కోస్టా రిక ప్రభుత్వం సినిమా పరిశ్రమను ప్రోత్సహించడం తెలుగు నిర్మాతలను ఆకర్షిస్తోంది.
