దర్శకధీరుడు రాజమౌళి దర్శకత్వంలో హాస్యనటుడు సునీల్ హీరోగా నటించిన విజయవంతమైన చిత్రం ‘మర్యాదరామన్న’. 2010 లో విడుదలైన ఈ సినిమా సరిగ్గా 10 ఏళ్ళు పూర్తి చేసుకుంది. రాయలసీమ లోని ఒక గ్రామం. మర్యాద , మన్నన కలిగిన ఒక ఫ్యాక్షన్ ఫ్యామిలీ. తేడాలొస్తే .. పగ తీర్చుకోడానికి , ప్రాణాలు తీయడానికి కూడా వెనుకాడరు. విధి వశాత్తూ ఆ కుటుంబ సభ్యుల చేతికి చిక్కి.. ప్రాణాల్ని అరచేతుల్లో పెట్టుకొని ఆ ఇంటిలో బిక్కు బిక్కుమంటూ గడుపుతాడు రాము అనే యువకుడు. ఎంత శత్రువైనా.. వారింట్లో ఉన్నంతవరకే అతిథి. గడపదాటితే రక్తపాతమే. మరి అలాంటి పరిస్థితుల్లో చిక్కపడిన హీరో .. పులిమీద పుట్రలా ఆ ఇంటి అమ్మాయిని ఆకర్షిస్తాడు. ఆ అమ్మాయి ప్రేమకు పాత్రుడవుతాడు. మరి ఆ ఫ్యాక్షన్ రాక్షసుల నుంచి అతడు ఎలా బతికి బట్టకడతాడు అనే కథాంశంతో ఈ సినిమా తెరకెక్కింది. సలోనీ కథానాయికగా నటించిన ఈ సినిమాలో .. ఇంకా నాగినీడు, ప్రబాకర్, సుప్రీత్ రెడ్డి , బ్రహ్మాజీ , యస్.యస్.కాంచి ఇతర ముఖ్యపాత్రలు పోషించారు.
ఆద్యంతం హాస్యం, ఎమోషన్స్ మేళివించి ఈ సినిమాను జనరంజకంగా తీర్చిదిద్దాడు రాజమౌళి. యస్.యస్.కాంచి కథ, మాటలు అందించిన ఈ సినిమాకి యం.యం.కీరవాణి అద్భుతమైన స్వరాలు కూర్చాడు. ది హాస్పిటాలిటీ అనే హాలీవుడ్ మూవీ ఆధారంగా తెరకెక్కిన ఈ సినిమా ఘనవిజయం సాధించింది.
