Mammootty : మలయాళ సినీ పరిశ్రమలోని మెగాస్టార్ మమ్ముట్టిని మాఫియా డాన్‌గా ప్రేక్షకులకు పరిచయం చేసిన చిత్రం ‘బిగ్‌ బీ’. అమల్‌ నీరద్‌ దర్శకత్వంలో 2007లో విడుదలైన ఈ సినిమా మాస్‌ ఆడియన్స్‌ను ఎంతగానో అలరించింది. బిలాల్ జాన్‌ కురిశింగల్‌ పాత్రలో మమ్ముట్టి నటనకు ప్రేక్షకులు ఫిదా అయ్యారు.
ఈ సినిమా సక్సెస్‌తో దీనికి సీక్వెల్‌ రాబోతున్నట్లు ప్రకటించినా, అనివార్య కారణాల వల్ల చిత్రీకరణ ప్రారంభం కాలేదు. కానీ తాజాగా ఈ ప్రాజెక్టు గురించి ఆర్ట్ డైరెక్టర్‌ జోసెఫ్‌ నెల్లికల్‌ కొన్ని ఆసక్తికర విషయాలను వెల్లడించారు. “బిలాల్ సినిమా ఆగిపోయిందని అందరూ అనుకుంటున్నారు. కానీ దర్శకుడు అమల్‌ ప్రస్తుతం ఈ సినిమా స్క్రిప్ట్‌ను మరింత బలోపేతం చేస్తున్నారు. మమ్ముట్టి జాబితాలో ఉన్న సినిమాలు పూర్తయ్యాక దీని చిత్రీకరణను మొదలుపెడతాం.
మమ్ముట్టి మరోసారి బిలాల్‌గా తన యాక్షన్ హంగామాను మొదలుపెట్టే సమయం ఆసన్నమైంది” అని జోసెఫ్‌ తెలిపారు. అంటే, మమ్ముట్టి ఫ్యాన్స్‌కు మంచి సర్‌ప్రైజ్‌ రెడీ అవుతున్నట్లు ఈ వార్త స్పష్టం చేస్తోంది. మళ్లీ ఒకసారి బిలాల్‌గా స్క్రీన్‌పై కనిపించబోతున్న మమ్ముట్టిని చూడటానికి అభిమానులు ఎంతగానో ఆసక్తిగా ఎదురు చూస్తున్నారు.
