Lucky Bhaskar trailer : దీపావళి కానుకగా తెలుగు ప్రేక్షకులను అలరించడానికి సిద్ధంగా ఉన్న చిత్రం “లక్కీ భాస్కర్”. మలయాళీ స్టార్ దుల్కర్ సల్మాన్, సక్సెస్ పుల్ డైరెక్టర్ వెంకీ అట్లూరి కలయికలో రూపొందిన ఈ చిత్రంపై భారీ అంచనాలు నెలకొన్నాయి. అక్టోబర్ 31న భారీ ఎత్తున థియేటర్స్ లోకి రాబోతోంది ఈ సినిమా. ఈ నేపథ్యంలో లక్కీ భాస్కర్ ట్రైలర్ ను రిలీజ్ చేశారు మేకర్స్.
“లక్కీ భాస్కర్” ఒక పీరియాడిక్ కథ. ఒక సాధారణ బ్యాంక్ ఉద్యోగిగా జీవితం గడుపుతున్న భాస్కర్, తన భార్యతో సంతోషంగా ఉండేందుకు ఆశపడుతుంటాడు. అయితే, ప్రమోషన్ కోసం పోటీపడే క్రమంలో అప్పుల ఊబిలో చిక్కుకుంటాడు. సొమ్ము ఉంటేనే గౌరవం దక్కుతుందనే భ్రమలో పడి, విలాసవంతమైన జీవితానికి అలవాటు పడతాడు.
దర్శకుడు వెంకీ అట్లూరి ఈ సినిమాలో మిడిల్ క్లాస్ బ్యాక్‌డ్రాప్‌ను ఎంచుకున్నారు. అయితే, ఇది సాధారణ మిడిల్ క్లాస్ కథ కాదు. కాలాన్ని వెనక్కి తిప్పి, అప్పటి సమాజం, ఆర్థిక పరిస్థితులను తెరపై ఆవిష్కరించారు. విజువల్స్, ఆర్టిస్టుల నటన, కథలోని లోతు ఈ చిత్రానికి ప్రత్యేక ఆకర్షణగా నిలుస్తాయి. మహానటి తర్వాత తెలుగు సినిమా పరిశ్రమపై ప్రత్యేక దృష్టి పెట్టిన దుల్కర్ సల్మాన్, ఈ సినిమా కోసం ఎంతో కష్టపడ్డాడు. తెలుగు ప్రేక్షకులను అలరించడానికి అతను చేసిన ప్రయత్నం తెరపై స్పష్టంగా కనిపిస్తుంది.
ధనుష్‌ హీరోగా ‘సార్’ చిత్రంతో సూపర్ హిట్ అందుకున్న దర్శకుడు వెంకీ అట్లూరి, ఈ సారి కోలీవుడ్ నుంచి మల్లువుడ్ కు వెళ్లిపోయి అక్కడి కథానాయకుడిని పట్టుకొచ్చాడు. మీనాక్షి చౌదరి హీరోయిన్‌గా నటించగా, జివి ప్రకాష్ కుమార్ సంగీతం అందించారు. ఈ చిత్రంపై తెలుగు సినిమా పరిశ్రమలో భారీ అంచనాలు నెలకొన్నాయి.
