Lucky Bhaskar : మలయాళ సూపర్ స్టార్ దుల్కర్ సల్మాన్ నటించిన తాజా చిత్రం ‘లక్కీ భాస్కర్’. ఈ సినిమా దీపావళి కానుకగా అక్టోబర్ 31వ తేదీన ప్రేక్షకుల ముందుకు రాబోతుంది. బ్లాక్‌బస్టర్ డైరెక్టర్ వెంకీ అట్లూరి దర్శకత్వం వహించగా, సితార ఎంటర్‌టైన్‌మెంట్స్‌, ఫార్చూన్‌ఫోర్ సినిమాస్‌ పతాకాలపై సూర్యదేవర నాగవంశీ, సాయి సౌజన్య నిర్మించారు. మీనాక్షి చౌదరి కథానాయికగా నటించిన ఈ చిత్రానికి జి.వి. ప్రకాష్ కుమార్ సంగీతం అందించారు. లేటెస్ట్ గా డైరెక్టర్ వెంకీ అట్లూరి, ప్రొడ్యూసర్ నాగవంశీ మీడియా మీట్ నిర్వహించి చిత్ర విశేషాలను తెలిపారు.
దర్శకుడు వెంకీ అట్లూరి మాట్లాడుతూ, “లక్కీ భాస్కర్ చిత్రీకరణ పూర్తయింది. నిర్మాణాంతర కార్యక్రమాలు చివరి దశకు చేరుకున్నాయి. సినిమా చాలా బాగా వచ్చింది. ఇప్పటిదాకా నేను తీసిన సినిమాల్లో ఇది విభిన్న చిత్రంగా నిలుస్తుందని భావిస్తున్నాను” అని అన్నారు. ఈ చిత్రం ద్వారా ఆయన మరోసారి ప్రేక్షకులను అలరించడానికి సిద్ధమవుతున్నారు.
అక్టోబర్ 21న చిత్రం ట్రైలర్ విడుదల చేయబోతున్నట్లు నిర్మాతలు ప్రకటించారు. ట్రైలర్‌తో ప్రేక్షకుల్లో మరింత ఆసక్తిని రేకెత్తిస్తామని భావిస్తున్నారు. అక్టోబర్ 26 లేదా 27 తేదీల్లో ప్రీ రిలీజ్ ఈవెంట్ ను నిర్వహించనున్నట్లు నిర్మాత నాగవంశీ తెలిపారు.
దీపావళి కానుకగా అక్టోబర్ 31వ తేదీన ప్రపంచవ్యాప్తంగా భారీ స్థాయిలో ‘లక్కీ భాస్కర్’ చిత్రాన్ని విడుదల చేయాలని నిర్మాతలు నిర్ణయించారు. అక్టోబర్ 30 నుంచి ప్రీమియర్ షోలు ప్రదర్శించనున్నారు. సినిమా పట్ల చాలా నమ్మకంగా ఉన్నందున ముందు రోజు సాయంత్రం నుంచే తెలుగు రాష్ట్రాల వ్యాప్తంగా ప్రీమియర్ షోలు వేయాలని నిర్ణయించామని నాగవంశీ తెలిపారు.
