Euphoria movie : ప్రముఖ దర్శకుడు గుణశేఖర్ తన తాజా చిత్రం ‘యుఫోరియా’తో ప్రేక్షకులను ఆశ్చర్యపరుస్తున్నారు. ‘శాకుంతలం’ తర్వాత గుణశేఖర్ దర్శకత్వం వహిస్తున్న ఈ సినిమాలో స్టార్ హీరోలు లేకున్నా, కొత్త తరం నటులతో ప్రత్యేకమైన కథాంశంతో ఆకట్టుకుంటోంది. లేటెస్ట్ గా ఈ సినిమా నుంచి ఒక గ్లింప్స్ వీడియో విడుదల చేశారు మేకర్స్.
యువత, డ్రగ్స్ కేంద్రంగా ఈ సినిమా కథ తెరకెక్కుతోంది. కాలేజీల్లో మత్తు పదార్థాల దుర్వినియోగం పెరుగుతున్న నేపథ్యంలో ఈ సినిమా యువత ఎలా ఈ మత్తులో చిక్కుకుంటున్నారో, వారి జీవితాలు ఎలా నాశనం అవుతున్నాయో రియలిస్టిక్‌గా చూపిస్తుంది. ముఖ్యంగా, మత్తు పదార్థాల వల్ల మహిళలు ఎలా ఇబ్బందులు పడుతున్నారో, అత్యాచారాల వంటి దుర్ఘటనలు ఎలా జరుగుతున్నాయో కూడా ఈ సినిమాలో ప్రస్తావించబడింది.
గుణశేఖర్ ఎల్లప్పుడూ కళాత్మక చిత్రాలకు ప్రాధాన్యం ఇచ్చే దర్శకుడు. అయితే, ‘యుఫోరియా’తో ఆయన తన పద్ధతిని మార్చినట్లు అనిపిస్తుంది. ఈ సినిమాలో ఆయన ఈ తరం ప్రేక్షకుల అభిరుచిని దృష్టిలో ఉంచుకుని, ప్రస్తుత సమాజంలోని ఒక ముఖ్యమైన సమస్యను తెరపైకి తెచ్చారు. గుణశేఖర్ తన సినిమాల్లో ఎల్లప్పుడూ స్టార్ హీరోయిన్లను ఎంచుకునేవారు. ‘ఒక్కడు’ సినిమాతో భూమికను స్టార్ హీరోయిన్‌గా మార్చిన గుణశేఖర్, ‘యుఫోరియా’లో మళ్లీ ఆమెతో కలిసి పని చేస్తున్నారు. గ్లింప్స్‌లో భూమిక చాలా బలమైన పాత్రలో కనిపించడం విశేషం. ఆమె పాత్ర ఈ సినిమాలో ఎలాంటి పాత్ర పోషిస్తుందో తెలియాలంటే సినిమా విడుదల వరకు వేచి చూడాల్సిందే.
