Dilraju : గత 20 ఏళ్లుగా తెలుగు చిత్ర పరిశ్రమలో తనదైన ముద్ర వేసిన దిల్‌రాజు.. ఇప్పటికీ టాలీవుడ్ టాప్ నిర్మాతల్లో ఒకరు. ఒకప్పుడు గీతా ఆర్ట్స్, సురేష్ ప్రొడక్షన్స్ లాంటి సంస్థలతో పోటీపడిన దిల్‌రాజు.. ఇప్పుడు మైత్రీ మూవీ మేకర్స్, సితార ఎంటర్ టైన్ మెంట్స్, పీపుల్ మీడియా ఫ్యాక్టరీ వంటి దిగ్గజ సంస్థలతో పోటీపడుతూ.. మరింత దూకుడు పెంచుతున్నాడు.
ఈ నెలలోనే ‘లవ్ మీ’ సినిమాతో ప్రేక్షకుల ముందుకు రాబోతున్న దిల్‌రాజు.. ఆ తర్వాత మెగా ప్రాజెక్ట్ ‘గేమ్ ఛేంజర్’ ను తెరపైకి తీసుకురాబోతున్నాడు. రామ్ చరణ్ హీరోగా, శంకర్ దర్శకత్వం వహించిన ఈ సినిమా అక్టోబర్ లేదా నవంబర్ లో విడుదల కానుంది. నితిన్ తో ‘తమ్ముడు’ సినిమా చిత్రీకరణ శరవేగంగా జరుగుతోంది. విజయ్ దేవరకొండతో రవికిరణ్ కోలా దర్శకత్వంలో ఓ సినిమాను ప్రకటించాడు దిల్‌రాజు. ఈ సినిమా ప్రస్తుతం ప్రీ ప్రొడక్షన్ దశలో ఉంది. వెంకటేష్ తో అనిల్ రావిపూడి దర్శకత్వంలో ఓ సినిమాకు సన్నాహాలు జరుగుతున్నాయి.
నాని హీరోగా ‘బలగం’ వేణుతో ‘ఎల్లమ్మ’ అనే సినిమా లైన్లో ఉంది. బాలకృష్ణ, రవితేజ వంటి సీనియర్ హీరోలతోనూ సినిమాలు డిస్కషన్స్ లో ఉన్నాయి. ధనుష్ హీరోగా ‘శ్రీకారం’ ఫేమ్ కిషోర్ రెడ్డితో ఓ సినిమాకు గ్రీన్ సిగ్నల్ ఇచ్చాడు దిల్‌రాజు. మరోవైపు.. వంశీ పైడిపల్లి డైరెక్షన్ లో షాహిద్ కపూర్ తో ఓ బాలీవుడ్ ప్రాజెక్ట్ చేయడానికి సన్నాహాలు చేస్తున్నాడు. పరశురామ్, ఇంద్రగంటి మోహన్ కృష్ణ, శైలేష్ కొలను వంటి దర్శకులు కూడా దిల్‌రాజుతో సినిమాలు చేయడానికి సిద్ధంగా ఉన్నారు. మొత్తంమీద.. ఈమధ్య కాస్త దూకుడు తగ్గించారనే పేరొచ్చినా.. దిల్‌రాజు ప్రాజెక్ట్స్ లైనప్ చూస్తే మాత్రం అదంతా ఒట్టిదే అనిపిస్తోంది.
