Dhanush – Nityamenon : తెలుగు సినీ ప్రేక్షకులకు ఇష్టమైన జంట ధనుష్‌, నిత్యామేనన్‌. ‘తిరు’ సినిమాతో ప్రేక్షకులను ఎంతగానో అలరించిన ఈ జంట మరోసారి కలిసి నటించనున్నారనే వార్త సినీ ప్రేమికులను ఖుషీ చేస్తోంది. నిత్యామేనన్‌ తాజా ఇంటర్వ్యూలో ఈ విషయం గురించి మాట్లాడుతూ… తాను ధనుష్‌తో కలిసి నటిస్తున్న కొత్త సినిమా గురించి అధికారికంగా ప్రకటించలేనని చెప్పింది. అయితే, ఈ సినిమా గ్రామీణ నేపథ్యంలో రూపొందుతుందని, తన పాత్ర చాలా కొత్తగా, సవాలుగా ఉంటుందని తెలిపింది.
‘తిరు’ సినిమాలో శోభన పాత్రతో ప్రేక్షకులను అలరించిన నిత్యామేనన్‌, ఈ కొత్త సినిమాలో కూడా అంతే స్థాయిలో ప్రదర్శన ఇస్తుందని అభిమానులు ఆశిస్తున్నారు. ధనుష్‌ దర్శకత్వంలో రాబోతున్న తన నాల్గో చిత్రంలో నిత్య కథానాయికగా నటించనుందనే ఊహాగానాలు సినీ ప్రియుల్లో జోరుగా సాగుతున్నాయి. ‘తిరు’ సినిమాలో స్నేహితులుగా ప్రేక్షకులను మెప్పించిన ఈ జంట, ఈ కొత్త సినిమాలో ఎలాంటి మ్యాజిక్‌ చేస్తుందో చూడాలని ప్రేక్షకులు ఆసక్తిగా ఎదురు చూస్తున్నారు.
