Nandamuri Balakrishna : టాలీవుడ్‌లో ఒక నటుడు 50 ఏళ్ల పాటు ప్రేక్షకులను అలరిస్తూ ఉండటం అరుదైన విషయం. అలాంటి అరుదైన ఘనత సాధించిన నటుడు నందమూరి బాలకృష్ణ. ‘తాతమ్మ కల’ చిత్రంతో బాల నటుడిగా తెరంగేట్రం చేసిన బాలకృష్ణ, నటుడిగా 50 ఏళ్లు పూర్తి చేసుకుంటున్నారు. ప్రస్తుతం బాబీ దర్శకత్వంలో 108వ సినిమాతో బిజీగా ఉన్న బాలకృష్ణ, తన 50 ఏళ్ల సినీ జీవితం పూర్తి చేసుకున్న సందర్భంగా స్వర్ణోత్సవ వేడుకలను ఘనంగా నిర్వహించేందుకు తెలుగు చలన చిత్ర పరిశ్రమ సిద్ధమవుతోంది.
ఈ స్వర్ణోత్సవ వేడుకలను సెప్టెంబర్ 1న నిర్వహించాలని నిర్ణయించారు. ఈ వేడుకలకు సంబంధించిన వివరాలను వెల్లడించేందుకు బుధవారం ఫిలిం నగర్‌లోని ఎఫ్‌ఎన్‌సీసీలో కౌంట్‌డౌన్ రైజర్ కార్యక్రమాన్ని ఘనంగా నిర్వహించారు. ఈ కార్యక్రమానికి అనేక మంది సినీ ప్రముఖులు హాజరై బాలకృష్ణను అభినందించారు. ముఖ్యంగా నందమూరి రామకృష్ణ, నందమూరి మోహనకృష్ణలు ఈ కార్యక్రమంలో పాల్గొని స్వర్ణోత్సవ వేడుకల పోస్టర్‌ను ఆవిష్కరించారు.
బాలకృష్ణ 50 ఏళ్ల పాటు తెలుగు సినమా రంగంలో చేసిన కృషి అనన్య సామాన్యమైనది. ఆయన నటించిన చిత్రాలు ప్రేక్షకులను ఎంతగా ఆకట్టుకున్నాయో ప్రత్యేకంగా చెప్పనక్కర్లేదు. తన నటనతో పాటు, ఆయన సమాజ సేవలోనూ చురుగ్గా పాల్గొంటారు. ఈ సందర్భంగా బాలకృష్ణకు తెలుగు సినీ పరిశ్రమ తరపున శుభాకాంక్షలు తెలియజేయాలి.
