Citadel IInd trailer : టాలీవుడ్ టాప్ హీరోయిన్ అందాల సమంత నటించిన లేటెస్ట్ వెబ్ సిరీస్ “సిటాడెల్: హనీ బన్నీ”. త్వరలో ప్రేక్షకులను అలరించబోతోంది. ఈ స్పై థ్రిల్లర్ సిరీస్ లో బాలీవుడ్ హీరో వరుణ్ ధావన్ కూడా ప్రధాన పాత్రలో నటించగా, రాజ్ అండ్ డీకే దర్శకత్వం వహించారు. ప్రముఖ నిర్మాణ సంస్థలు డీ2ఆర్ ఫిల్మ్స్ అండ్ అమెజాన్ ఎంజీఎం స్టూడియోస్ సంయుక్తంగా ఈ సిరీస్ నిర్మించారు.
నవంబర్ 7వ తేదీ నుంచి అమెజాన్ ప్రైమ్ వీడియోలో ప్రసారం కానున్న ఈ సిరీస్ పై మేకర్స్ పెద్ద ఎత్తున ప్రమోషన్స్ నిర్వహిస్తున్నారు. ఇటీవల విడుదలైన ట్రైలర్ మంచి స్పందన పొందగా, తాజాగా మరో ట్రైలర్ ను విడుదల చేశారు. ఇందులో సమంత, వరుణ్ ధావన్ కలిసి చేసిన యాక్షన్ సీన్స్ ప్రేక్షకులని ఆకట్టుకుంటున్నాయి. 1990 కాలం నేపథ్యంతో కథ సాగుతుందని ట్రైలర్ స్పష్టతనిస్తోంది. వరుణ్ “బన్నీ” పాత్రలో కనిపిస్తుండగా, తన కుమార్తెను రక్షించుకునేందుకు పోరాడుతున్న పాత్రలో సమంత ఆకట్టుకుంటున్నారు.
సమంత ఈ సిరీస్ లో ఎమోషన్స్, యాక్షన్ సీన్స్ లో విభిన్నంగా నటించారు. డూప్ లేకుండా స్వయంగా యాక్షన్ సీక్వెన్స్ లో పాల్గొనడం ఆమెకి ప్రత్యేకతగా నిలిచింది. సిరీస్ పై నెటిజన్లలో ఆసక్తి పెరుగుతోంది, సోషల్ మీడియాలో “వెయిటింగ్ ఫర్ సిరీస్” అంటూ ట్రెండ్ అవుతోంది. అమెరికన్ వెబ్ సిరీస్ సిటాడెల్ కు ఇండియన్ వెర్షన్ గా రూపొందిన ఈ సిరీస్, హిందీతో పాటు తెలుగు, తమిళం, కన్నడ, మలయాళం భాషల్లో కూడా స్ట్రీమింగ్ కానుంది.
