BB4 : నందమూరి బాలకృష్ణ, బోయపాటి శ్రీను కాంబినేషన్ అంటేనే చెప్పలేని క్రేజ్. ‘సింహా’, ‘లెజెండ్’, ‘అఖండ’ వంటి సినిమాలతో ఈ జోడి తెలుగు సినీ ఇండస్ట్రీలో ఒక ప్రత్యేక స్థానాన్ని సంపాదించుకుంది. ఈ సూపర్‌హిట్ కాంబినేషన్ మళ్లీ కలిసి ప్రేక్షకులను అలరించడానికి సిద్ధమవుతోంది. నందమూరి బాలకృష్ణ పుట్టినరోజు సందర్భంగా #BB4 చిత్రాన్ని అధికారికంగా ప్రకటించారు. ‘లెజెండ్’ చిత్రాన్ని నిర్మించిన రామ్ అచంట మరియు గోపి అచంట తమ 14 రీల్స్ ప్లస్ పతాకంపై ఈ చిత్రాన్ని నిర్మించనున్నారు. బాలకృష్ణ చిన్న కూతురు తేజస్విని ఈ చిత్రాన్ని సమర్పిస్తున్నారు.
ఫ్యాన్స్ ఎంతో ఆసక్తిగా ఎదురుచూస్తున్న ఈ చిత్రం అక్టోబర్ 16న ఉదయం 10 గంటలకు గ్రాండ్‌గా ప్రారంభం కానుంది. ఈ కార్యక్రమంలో సినిమా వివరాలు, నటీనటులు, టెక్నీషియన్లపై మరిన్ని విశేషాలు తెలియజేయనున్నారు. ఈ చిత్రాన్ని బాలకృష్ణ కెరీర్‌లోనే అత్యంత భారీ బడ్జెట్‌తో రూపొందించనున్నారు. టాప్-నాచ్ టెక్నికల్ స్టాండర్డ్స్‌తో తెరకెక్కించబోతున్న ఈ చిత్రం, బాలకృష్ణకు ఇప్పటివరకు చేసిన సినిమాల్లో అత్యంత ఖరీదైన సినిమాగా ఉండబోతుంది. కేవలం మాస్ ఎలిమెంట్స్ మాత్రమే కాకుండా, కథలో సరికొత్త కోణం ఉంటుందని, దీనితో పాటు అత్యున్నత సాంకేతిక నైపుణ్యాలను వినియోగిస్తూ ప్రేక్షకులకు ఒక కొత్త అనుభూతిని ఇచ్చే ప్రయత్నం చేస్తున్నారని తెలుస్తోంది.
‘అఖండ’ చిత్రంతో నందమూరి బాలకృష్ణ, బోయపాటి శ్రీను కాంబో తెలుగు సినీ పరిశ్రమలో సెన్సేషనల్ హిట్ అందించింది. ఈ చిత్రం అన్ని వర్గాల ప్రేక్షకులను ఆకట్టుకుంటూ బాలకృష్ణ మార్కెట్‌ను మరింత స్థాయికి తీసుకెళ్లింది. ఇప్పుడు, ఆ హిట్ తర్వాత మళ్లీ బోయపాటి, బాలకృష్ణ కాంబోలో రాబోతున్న ఈ #BB4 సినిమా మరింత పెద్ద అంచనాలను క్రియేట్ చేస్తోంది. ఈసారి కూడా ఈ చిత్రం నందమూరి అభిమానులకు పండగను అందించే అవకాశం ఉన్నట్లు ఇండస్ట్రీలో చర్చ జరుగుతోంది. దసరా సందర్భంగా విడుదల చేసిన పోస్టర్ చూస్తే, ఈ చిత్రంలో కూడా ఒక పవర్‌ఫుల్ కథాంశం ఉండబోతుందని అర్థమవుతోంది. పోస్టర్‌లో దుర్గామాత ఐకానిక్ లుక్ కనిపిస్తుంది, అది సినిమాకు ఒక ప్రత్యేక ఆకర్షణగా నిలుస్తుంది.
