‘రూలర్’ తర్వాత నందమూరి బాలకృష్ణ నటిస్తోన్న చిత్రంపైనే అందరి ఆసక్తి. మాస్ చిత్రాల దర్శకుడు బోయపాటి శ్రీను దర్శకత్వంలో తన తదుపరి చిత్రాన్ని చేస్తున్నారు ఆయన. ఇంతకు వీరిద్దరి కాంబోలో వచ్చిన ‘సింహా, లెజెండ్’ చిత్రాలు ఘన విజయం సాధించిన నేపథ్యంలో ఇప్పుడీ చిత్రం మీద విపరీతమైన అంచనాలు నెలకొన్నాయి. బాలకృష్ణ ద్విపాత్రాభినయం చేస్తోన్న ఈ సినిమాకు ‘మోనార్క్’ అనే పవర్ ఫుల్ టైటిల్ ఖాయం చేయబోతున్నట్టు .. ఆమేరకు ఈ టైటిల్ ను ఫిల్మ్ ఛాంబర్ లో రిజిస్టర్ చేసినట్టు సమాచారం.
జూన్ 10వ తేదీన బాలకృష్ణ పుట్టినరోజు. ఆ రోజు సినిమా పేరుని అధికారికంగా ప్రకటించనున్నారని చెప్పుకుంటున్నారు. అయితే అధికారికంగా ఇప్పటి వరకు ఎలాంటి సమాచారం బయటకు రాలేదు. చిత్రంలో బాలయ్య రెండుకోణాల్లో కనిపించనున్నారు. ఒక పాత్ర అఘోరగా కనిపించనున్నట్లు సమాచారం. ద్వారకా క్రియేషన్స్ పతాకంపై నిర్మితమయ్యే ఈసినిమాకి మిర్యాల రవీందర్‌రెడ్డి నిర్మాత. ఇందులో కథానాయికగా నయనతార, శ్రియ శరణ్‌, నమిత లాంటి పేర్లు సామాజిక మాధ్యమాల్లో హల్‌చల్‌ చేస్తున్నాయి. కానీ ఇప్పటి వరకు కథానాయిక ఎవరనేది ఇంకా తెలియదు. తమన్‌ సంగీతం అందిస్తున్న ఈ చిత్రంలో కొత్త కథానాయికను పరిచయం చేయడానికి చిత్రబృందం ప్రయత్నాలు చేస్తున్నారు.
