Anushka Shetty : టాలీవుడ్ లో ప్రస్తుతం అత్యంత ఆసక్తిగా ఎదురుచూస్తున్న చిత్రాలలో ‘ఘాటీ’ ఒకటి. అందాల హీరోయిన్.. స్వీటీ అనుష్క శెట్టి ప్రధాన పాత్రలో నటిస్తున్న ఈ చిత్రం.. దాని చుట్టూ నెలకొన్న హైప్‌తో అందరి దృష్టిని ఆకర్షిస్తోంది. ‘హరిహర వీరమల్లు’ చిత్రం దర్శకత్వ బాధ్యతలు మరొకరికి అప్పగించిన తర్వాత కూడా దర్శకుడు క్రిష్ తన స్పీడ్‌ను తగ్గించలేదు.
గతంలో ‘గౌతమిపుత్ర శాతకర్ణి’ వంటి భారీ బడ్జెట్ చిత్రాన్ని తక్కువ సమయంలో పూర్తి చేసి అందరిని ఆశ్చర్యపరిచిన క్రిష్, ‘ఘాటీ’ చిత్రాన్ని కూడా అంతే వేగంగా పూర్తి చేయడానికి ప్రయత్నిస్తున్నారు. ఇప్పటికే చిత్రీకరణ దాదాపు తొంభై శాతం పూర్తయింది. త్వరలోనే చివరి షెడ్యూల్‌ను ఒడిశాలో పూర్తి చేయనున్నారు.
‘ఘాటీ’ చిత్రం యొక్క కథాంశం మాఫియా నేపథ్యంలో సాగుతుందని తెలుస్తోంది. అనుష్కను గతంలో ఎన్నడూ చూడని ఓ కొత్త పాత్రలో క్రిష్ ప్రేక్షకుల ముందుకు తీసుకురాబోతున్నారు. ఈ చిత్రం చిత్రీకరణ ఇంకా ప్రారంభం కాకముందే అమెజాన్ ప్రైమ్ ఈ చిత్రం కోసం ఒప్పందం చేసుకోవడం విశేషం.
‘భాగమతి 2’ చిత్రం గురించి ప్రచారం జరుగుతున్నప్పటికీ, అధికారిక ప్రకటన రావడానికి ఇంకా కొంత సమయం పట్టవచ్చు. ‘ఘాటీ’ చిత్రం వేసవి కాలంలో విడుదలయ్యే అవకాశాలు ఉన్నాయి. తమిళ హీరో విక్రమ్ ప్రభుతో పాటు జగపతి బాబు, చైతన్యరావు, రవీంద్ర విజయ్, విటివి గణేష్ వంటి నటులు ఈ చిత్రంలో కీలక పాత్రలు పోషిస్తున్నారు.
