Anushka Shetty : తెలుగు సినీ పరిశ్రమలో తనకంటూ ప్రత్యేక గుర్తింపు సంపాదించుకున్న బ్యూటిఫుల్ హీరోయిన్ అనుష్క శెట్టి. ఇప్పుడు తన కెరీర్‌లో మరో కొత్త అధ్యాయాన్ని ప్రారంభించింది. ఆమె మలయాళ చిత్రపరిశ్రమలోకి అడుగు పెట్టింది. ఆమె తొలి మలయాళ చిత్రం ‘కత్తనార్ – ది వైల్డ్ సోర్సెరర్’. ఈ చిత్రం హారర్ ఫాంటసీ థ్రిల్లర్‌గా రూపొందుతోంది.
ఈ చిత్రం 9వ శతాబ్దపు క్రైస్తవ మత గురువు కడమట్టత్తు కత్తనార్ కథను ఆధారంగా చేసుకుని తెరకెక్కుతోంది. ఈ చిత్రంలో అనుష్క శెట్టి మునుపెన్నడూ చూడని విభిన్నమైన అవతారంలో కనిపించనున్నారు. ఆమె పాత్ర గురించి ఇప్పటికే చాలా ఆసక్తికరమైన విషయాలు వెలువడుతున్నాయి. ఈ సినిమాను రెండు భాగాలుగా విడుదల చేస్తుండడం విశేషం.
అనుష్క శెట్టి కథానాయికగా నటిస్తుండగా, జయసూర్య కథానాయకుడిగా నటిస్తున్నారు. రోజిన్ థామస్ ఈ చిత్రానికి దర్శకత్వం వహిస్తున్నారు. గోకులం గోపాలన్ ఈ చిత్రాన్ని నిర్మిస్తున్నారు. రాహుల్ సుబ్రహ్మణ్యం సంగీతం అందిస్తుండగా, నీల్ డి కున్హా ఛాయాగ్రహణం నిర్వహిస్తున్నారు.
ఈ చిత్రం 212 రోజుల పాటు 6 షెడ్యూల్స్‌లో చిత్రీకరించబడింది. తాజాగా చిత్రీకరణ పూర్తయింది. ప్రస్తుతం నిర్మాణానంతర పనులు జరుగుతున్నాయి. త్వరలోనే విడుదల తేదీ ప్రకటించనున్నారు. అనుష్క హీరోయిన్ గా నటిస్తుండడంతో ఈ సినిమాను తెలుగులో కూడా విడుదల చేసే అవకాశాలున్నాయి.
