Tollywood : ప్రేక్షకులను ఎంతగానో అలరించిన శివాజీ, లయ జంట మరోసారి తెరంపై కలిసి నటించనున్నారు. గతంలో ‘మిస్సమ్మ’, ‘టాటా బిర్లా మధ్యలో లైలా’, ‘అదిరిందయ్యా చంద్రం’ వంటి చిత్రాలతో ప్రేక్షకులను అలరించిన ఈ జంట, 14 ఏళ్ల తర్వాత మళ్లీ కలిసి నటించడం విశేషం. ఈసారి శివాజీ, లయ జంటగా కొత్త దర్శకుడు సుధీర్ శ్రీరామ్ దర్శకత్వంలో ఒక కామెడీ క్రైమ్ థ్రిల్లర్ చిత్రం చేస్తున్నారు. శివాజీ స్వయంగా ఈ చిత్రాన్ని నిర్మిస్తున్నారు.
ఆదివారం ఈ చిత్రం హైదరాబాద్‌లో పూజా కార్యక్రమాలతో వైభవంగా ప్రారంభమైంది. ముహూర్తపు సన్నివేశానికి దిల్‌రాజు క్లాప్‌ కొట్టగా, శివాజీ కుమారుడు రిక్కీ కెమెరా స్విచ్‌ ఆన్‌ చేశారు. స్టార్ దర్శకుడు బోయపాటి శ్రీను గౌరవ దర్శకత్వం వహించారు. బెక్కెం వేణుగోపాల్, బోయపాటి, దిల్‌రాజు సంయుక్తంగా స్క్రిప్ట్‌ అందించారు. చిత్ర వర్గాల ప్రకారం, ఈ చిత్రం మంగళవారం నుంచి రెగ్యులర్‌ చిత్రీకరణ మొదలు కానుంది. త్వరలోనే ఈ చిత్రానికి సంబంధించిన మరిన్ని వివరాలు వెల్లడి కానున్నాయి.
