Tollywood : తెలుగు సినిమా పరిశ్రమలో తనదైన ముద్ర వేసిన దర్శకుడు వంశీ పైడిపల్లి, ఇప్పుడు బాలీవుడ్‌లో తన అదృష్టాన్ని పరీక్షించుకోవడానికి సిద్ధమవుతున్నారు. ఇటీవల అట్లీ, సందీప్ రెడ్డి వంగా వంటి తెలుగు దర్శకులు బాలీవుడ్‌లో విజయవంతమైన సినిమాలు చేసి, తెలుగు సినిమా ప్రభావాన్ని దేశవ్యాప్తంగా విస్తరించారు. వారి తర్వాత వంశీ పైడిపల్లి కూడా బాలీవుడ్ బాట పట్టడం తెలుగు సినీ ప్రేమికులలో ఆసక్తిని రేకెత్తిస్తోంది.
వంశీ పైడిపల్లి ఇప్పటికే రణవీర్ సింగ్, రణబీర్ కపూర్ వంటి యంగ్ హీరోలతో చర్చలు జరిపినప్పటికీ, తాజా సమాచారం ప్రకారం బాలీవుడ్ సూపర్ స్టార్ అమీర్ ఖాన్‌తో కలిసి పని చేయబోతున్నట్లు తెలుస్తోంది. అమీర్ ఖాన్ గతంలో మురుగదాస్ దర్శకత్వంలో వచ్చిన “గజిని” సినిమాతో భారీ విజయాన్ని అందుకున్నారు. ఇప్పుడు వంశీ పైడిపల్లితో కలిసి మరోసారి విజయాన్ని అందుకోవాలని ఆశిస్తున్నాడు.
ఈ ప్రాజెక్టుకు ప్రముఖ నిర్మాత దిల్ రాజు సమర్పకుడిగా వ్యవహరించనున్నారు. వంశీ పైడిపల్లి, దిల్ రాజు కాంబినేషన్ తెలుగు సినిమా పరిశ్రమలో ఎంతో విజయవంతమైంది. “మున్నా”, “బృందావనం”, “ఎవడు”, “మహర్షి”, “వారసుడు” వంటి సినిమాలు ఈ జంటకు మంచి గుర్తింపు తెచ్చిపెట్టాయి. ఇప్పుడు బాలీవుడ్‌లో కూడా ఈ కాంబినేషన్ పనిచేస్తే, ప్రాజెక్టుపై భారీ అంచనాలు నెలకొనే అవకాశం ఉంది.
వంశీ పైడిపల్లి ఇప్పటికే ఈ ప్రాజెక్టు కోసం కథను రెడీ చేశారు. అమీర్ ఖాన్‌కు కథ వినిపించడంతో ఆయన కూడా ఈ కథపై మంచి ఆసక్తి చూపిస్తున్నారని సమాచారం. కథకు గ్రీన్ సిగ్నల్ రాగానే అధికారిక ప్రకటన వెలువడే అవకాశముంది. ప్రస్తుతం ఈ ప్రాజెక్ట్ పైన అఫీషియల్ ప్రకటన ఇంకా రాకపోయినా, ఈ సంవత్సరంలోనే ఈ ప్రాజెక్ట్ ప్రారంభం కావచ్చని సినీ వర్గాల్లో చర్చ జరుగుతోంది.
