తెలుగు సినిమాను కమర్షియల్ పట్టాలెక్కించిన దర్శకుల్లో ఆయన ఒకరు. హీరోల ఇమేజ్ ను అమాంతం పెంచి అభిమానుల ఆదరాభిమానాలు నిండుగా, మెండుగా పొందిన దర్శకుడాయన. వివిధ రకాల కథలతో వైవిధ్యమైన చిత్రాలు తెరకెక్కించి.. మాస్ అండ్ యాక్షన్ చిత్రాల దర్శకుడు అనిపించుకున్న ఆయన పేరు ఎ.కోదండరామిరెడ్డి. పర్టిక్యులర్ గా మెగాస్టార్ చిరంజీవితోనే దాదాపు 25 సినిమాలు తెరకెక్కించడం వల్లనేమో కానీ.. టాలీవుడ్ లో ఆయన్ను మెగా డైరెక్టర్ అని పిలుస్తారు.
సంధ్య చిత్రంతో దర్శకుడిగా తన సినీ కెరీర్ ను మొదలు పెట్టిన కోదండరామిరెడ్డి.. ఒక్క యన్టీఆర్ తో తప్ప.. నాటి అగ్రహీరోలందరితోనూ, అలాగే ఆ తర్వాత తరం అగ్ర హీరోలైన చిరంజీవి, బాలకృష్ణ, వెంకటేశ్, నాగార్జున లతోనూ ఇంకా.. అదితర హీరోలతోనూ సినిమాలు తెరకెక్కించిన దర్శకుడిగా కోదండరామిరెడ్డి చాలా ప్రత్యేకతను సంతరించుకున్నారు. అలాగే.. ఒక్క మాస్ యాక్షన్ చిత్రాలకే పరిమితం అవ్వకుండా.. ఆయన ఎన్నో కుటుంబ కథా చిత్రాల్ని తెరకెక్కించి .. ఆ జోనర్ లో కూడా తను చెయితిరిగిన దర్శకుడినని నిరూపించుకున్నారు. ముఖ్యంగా శోభన్ బాబుతో కోదండరామిరెడ్డి తెరకెక్కించిన సినిమాలన్నీ దాదాపు కమర్షియల్ గా మంచి సక్సెస్ సాధించాయి. ఇక ఆయన తెలుగుతో పాటు తమిళంలోనూ చిత్రాల్ని తెరకెక్కించారు. కోదండరామిరెడ్డికి ఇద్దరు కుమారులు కాగా, చిన్న కుమారుడు వైభవ్‌ కథానాయకుడిగా తెలుగు, తమిళ భాషల్లో కొనసాగుతున్నారు. నేడు కోదండరామిరెడ్డి పుట్టిన రోజ.. ఈ సందర్భంగా ఆ మెగా డైరెక్టర్ కు శుభాకాంక్షలు తెలుపుతోంది మూవీ వాల్యూమ్.
