డైనమిక్ డైరెక్టర్ పూరీ జగన్నాథ్ డ్రీమ్ ప్రాజెక్ట్ ‘జనగణమన’ ఒకప్పుడు టాలీవుడ్ లో టాక్ ఆఫ్ ది టౌన్ అయింది. సూపర్ స్టార్ మహేశ్ బాబు తో ఈ ప్రాజెక్ట్ సెట్స్ మీదకు వెళ్ళనుందని కూడా అప్పట్లో వార్తలొచ్చాయి. అసలు మహేశ్ బాబు ను దృష్టిలో పెట్టుకొనే ఈ స్ర్కిప్ట్ రాశానని పూరీ ఆ మధ్య ఎప్పుడో చెప్పాడు. అయితే రెండేళ్ళయిపోతున్నా ఇంతవరుకూ ఆ సినిమా కి సంబంధించిన ఊసేలేదు. తాజా గా ‘జనగణమన’ ప్రాజెక్ట్ కు సంబంధించిన వార్త మరోసారి మీడియాకెక్కింది. ఒక వెబ్ సైట్ కిచ్చిన ఇంటర్వ్యూలో .. త్వరలోనే ఈ సినిమా పాన్ ఇండియా కేటగిరిలో తెరకెక్కబోతోందని పూరీ చెప్పడం విశేషంగా మారింది. ఆ క్రమంలో తన డ్రీమ్ ప్రాజెక్ట్ ను వదిలిపెట్టే ప్రసక్తే లేదని కుండబద్దలు కొట్టేశాడు.
‘జనగణమన’ లాంటి దేశభక్తి చిత్రంలో హీరోగా మహేశ్ బాబు తప్ప మరో బెటర్ ఆప్షన్ లేదని అభిమానులు ఇప్పటికీ భావిస్తున్నారు. అయితే తాజా సమాచారం ప్రకారం.. పూరీ జగన్నాథ్ ఈ సినిమా కోసం ఓ స్టార్ హీరోని ఇటీవలే సంప్రదించాడని .. అతడు మరెవరో కాదు కేజీఎఫ్ హీరో యశ్ అని వార్తలొస్తున్నాయి. ఇటీవల యశ్ కు పూరీ పూర్తి నెరేషన్ ఇచ్చాడని .. అయితే ఆ ప్రాజెక్ట్ ఇంకా ఫైనలైజ్ అవలేదని తెలుస్తోంది. ప్రస్తుతం విజయ్ దేవరకొండ హీరోగా ఫైటర్ అనే మూవీ తెరకెక్కించే హడావిడిలో ఉన్నాడు పూరీ. బహుశా ఈ సినిమా తర్వాత పూరీ చేయబోయే సినిమా ‘జనగణమన’ నే అని ఫిల్మ్ నగర్ సమాచారం. మరి పూరీ డ్రీమ్ ప్రాజెక్ట్ లోకి ఫైనల్ గా మహేశ్ వస్తాడో లేక యశ్ వస్తాడో వేచి చూడాలి.
