సూపర్ స్టార్ రజనీకాంత్ సినిమాల్లో భారీ ఓపెనింగ్స్ తెచ్చిపెట్టి.. హైయస్ట్ గ్రాస్ కలెక్ట్ చేసిన చిత్రాల్లో ‘చంద్రముఖి’ ఒకటి. ఎప్పుడూ మాస్ యాక్షన్ మూవీస్ లోనే నటించే తలైవా.. తొలి సారిగా ఒక హారర్ థ్రిల్లర్ లో నటించడం ఆసక్తిని రేపితే.. అలాంటి జోనర్ లో కూడా తన ట్రేడ్ మార్క్ స్టైల్స్ ను వదిలిపెట్టకుండా.. సౌత్ ఆడియన్స్ ను మేస్మరైజ్ చేయడం ఆయనకే చెల్లింది. అలాగే చంద్రముఖిగా జ్యోతిక నటన కూడా అద్భుతంగా కుదరడంతో సినిమా సూపర్ హిట్టయింది .వాసు దర్శకత్వంలో తెరకెక్కిన ఈ సినిమా కన్నడ చిత్రం ఆప్తమిత్ర చిత్రానికి రీమేక్ వెర్షన్ . అయితే ఆ కన్నడ సినిమా .. మలయాళంలో ఇప్పటికీ క్లాసిక్ గా చెప్పుకొనే ‘మణిచిత్ర తాళు’ మూవీకి రీమేక్ గా తెరెక్కింది. మోహన్ లాల్, సురేశ్ గోపీ, శోభన నటించిన ఆ సినిమా కు ఎన్నో మార్పులు చేసి .. పి.వాసు కన్నడలో ఆప్తమిత్రగా రీమేక్ చేశారు. అదే సినిమాను యాజిటీజ్ గా తమిళ, తెలుగులో చంద్రముఖి గా తెరకెక్కించి అద్భుతాలు చేశారు. 2005 లో విడుదలైన ఈ సినిమా సరిగ్గా 15 ఏళ్ళు పూర్తి చేసుకోవడం విశేషం. విద్యాసాగర్ సంగీతం అందించిన ఈ సినిమాలోని పాటలు ఇప్పటికీ సంగీత ప్రియుల్ని అలరిస్తూనే ఉన్నాయి. రజనీకాంత్ నోటి వెంట వినిపించిన లకలకలక అనే వింత శబ్దం .. ఈ ఇప్పటికీ అభిమానుల గుండెల్లో మారుమోగుతునే ఉంది.
