‘సాహో’ తర్వాత డార్లింగ్ ప్రభాస్.. జిల్ ఫేమ్ రాధాకృష్ణ కుమార్ దర్శకత్వంలో ఒక రొమాంటిక్ థ్రిల్లర్ లో నటిస్తోన్న సంగతి తెలిసిందే. పామిస్ట్రీ పండితుడిగా ప్రభాస్ నటించే ఈ ప్రభాస్ 20 మూవీలో పూజా హెగ్డే కథానాయిక. శర వేగంగా షూటింగ్ జరుపుకుంటోన్న ఈ సినిమాకు సంబంధించిన ఒక స్టిల్ ఆ మధ్య సోషల్ మీడియాలో వైరల్ గా మారిన సంగతి తెలిసిందే. ఒక పెద్ద పియానో దగ్గర సిలౌట్ లో రివీలైన ప్రభాస్ లుక్ అభిమానుల్ని ఎంతగానో అలరించింది. అయితే అప్పటినుంచి ఇప్పటివరకూ ఈ సినిమాకు సంబంధించిన వేరే లుక్ ఒక్కటి కూడా విడుదల కాలేదు. అందుకే ప్రభాస్ అభిమానులకు ఈ ఉగాదికి ఫస్ట్ లుక్ పోస్టర్ ను గిఫ్ట్ గా ఇవ్వనున్నారట మేకర్స్ .
రెండు పోస్టర్స్ ను ఉగాది సందర్భంగా విడుదల చేసే ఆలోచన చేస్తోంది చిత్ర బృందం. రైల్వే కంపార్ట్ మెంట్ లో ప్రభాస్, పూజా హెగ్డే ఉన్న ఒక రొమాంటిక్ లుక్ ను, అలాగే.. ఆ జోడీ పియానో వాయిస్తోన్న మరో లుక్ ను విడుదల చేయబోతున్నారట. అంతేకాదు వీటితో పాటు టైటిల్ కూడా అప్పుడే రివీల్ కానుందని సమాచారం. రీసెంట్ గా ఇంటర్ నేషనల్ ఫైట్ కొరియాగ్రఫర్స్ ఆధ్వర్యంలో ఒక యాక్షన్ సీక్వెన్స్ ను షూట్ చేసిన యూనిట్ త్వరలో జార్జియా వెళ్ళనుంది. ఓ డియర్ , రాధే శ్యామ్ అనే రెండు టైటిల్స్ లో ఏ టైటిల్ ను ఖాయం చేయబోతున్నారనే విషయం ఆసక్తి రేపుతోంది. మరి ఉగాదికి మేకర్స్ ఇచ్చే గిఫ్ట్ ఎలా ఉంటుందో చూడాలి.
