పవర్ స్టార్ పవన్ కళ్యాణ్ రెండేళ్ళ గ్యాప్ తర్వాత ఇక ఏమాత్రం గ్యాప్ ఇవ్వకుండా.. వరుస సినిమాలతో కమ్ బ్యాక్ అవుతున్నాడు. ఒక పక్క బాలీవుడ్ పింక్ రీమేక్ , మరో పక్క క్రిష్ పీరియాడికల్ మూవీ. రెండూ సైమల్ టేనియస్ గా చిత్రీకరణ జరుపుకుంటున్నాయి. ఇంకా మరి కొన్ని సినిమాల్ని ఒకదాని తర్వాత ఒకటి పట్టాలెక్కించే ప్రయత్నంలో పవర్ స్టార్ ఉన్నాడు. ఇక అసలు విషయానికొస్తే.. ప్రస్తుతం శరవేగంగా షూటింగ్ జరుపుకుంటోన్న క్రిష్ మూవీ కి సంబంధించి వరుసగా వస్తోన్న అప్ డేట్స్ అభిమానుల్ని ఉక్కిరి బిక్కిరి చేస్తున్నాయి. ఈ సినిమా కోసం క్రిష్ ప్రత్యేకంగా ఒక పడవ సెట్ వేయిస్తున్నాడట. రాబిన్ హుడ్ తరహాలో ప్రజల కోసం మొఘలాయిల మీద తిరుగుబాటు బావుటా ఎగురవేసిన ఒక బందిపోటు దొంగ గా ఇందులో పవన్ కళ్యాణ్ కనిపిస్తాడట. పెద్దలను కొట్టి పేదలకు పెట్టు అనే సిధ్ధాంతంతో .. పవర్ స్టార్ ఒక స్పెషల్ గెటప్ తో తన నట విశ్వరూపం ప్రదర్శిస్తాడట.
ఇక ఈ సినిమాకి ‘విరూపాక్ష’ అనే టైటిల్ పరిశీలన లో ఉన్నట్టు మూవీ వాల్యూమ్ ఎప్పుడో చెప్పింది. కాగా ఈ టైటిల్ నే మూడొంతులు క్రిష్ ఖాయం చేయబోతున్నట్టు సమాచారం. ఇప్పటికే ఈ సినిమా మొదటి షెడ్యూల్ పూర్తవగా.. ఈ రోజు రెండో షెడ్యూల్ ప్రారంభం కానున్నట్టు సమాచారం. ప్రముఖ నిర్మాత ఏయం.రత్నం నిర్మాణ సారధ్యంలో తెరకెక్కుతోన్న ఈ సినిమా కు కీరవాణి సంగీతం అందిస్తున్నారు. మరి ఈ సినిమా పవర్ స్టార్ క్రేజ్ ను ఏ రేంజ్ కు తీసుకువెళుతుందో చూడాలి.
