యాక్షన్ కింగ్ అర్జున్ నటవారసురాలు ఐశ్వర్య 2013 లో విశాల్ హీరోగా నటించిన ‘పట్టత్తు యానై’ (పట్టపు ఏనుగు) అనే సినిమాతో కోలీవుడ్ కు హీరోయిన్ గా పరిచయమైంది. ఇదే సినిమా అప్పట్లో ‘ధీరుడు’ పేరుతో తెలుగులోనూ విడులైంది. బాక్సాఫీస్ వద్ద పాస్ మార్కులు మాత్రమే వేయించుకున్న ఈ సినిమా తర్వాత.. తమిళ, కన్నడ భాషల్లో మరికొన్ని చిత్రాల్లోనూ ఆమె నటించింది. అయితే ఇప్పుడు తండ్రి అర్జున్ ..ఆమెను తెలుగు తెరకు కూడా పరిచయం చేయనున్నారు.
నేడు ఐశ్వర్య పుట్టిన రోజు సందర్భంగా తన స్వీయ దర్శకత్వంలో ఒక సినిమా ను అనౌన్స్ చేశారు అర్జున్. ఇందులో ఐశ్వర్యా కథానాయికగా నటిస్తోంది. ఈ సినిమాకి సంబంధించిన మిగతా వివరాలు త్వరలోనే తెలుస్తాయి. గతంలో ‘జైహింద్, జైహింద్ 2, స్వయం వరం, ఏళుమలై, వాయుపుత్ర, మదరాసి, పరశురామ్’ లాంటి చిత్రాలతో మంచి దర్శకుడు అనిపించుకున్న అర్జున్ .. ఇప్పుడు టాలీవుడ్ లో తన వారసురాల్ని కథానాయికగా తన దర్శకత్వంలోనే పరిచయం చేయనుండడం విశేషంగా మారింది. మరి ఐశ్వర్యా అర్జున్ టాలీవుడ్ లో ఏ రేంజ్ లో క్రేజ్ తెచ్చుకుంటుందో చూడాలి.
