ప్రముఖ నిర్మాణ సంస్థ శ్రీదేవీ మూవీస్ పతాకంపై శివలెంక కృష్ణ ప్రసాద్ నిర్మాణంలో మోహనకృష్ణ ఇంద్రగంటి తెరకెక్కించిన చిత్రం ‘సారంగపాణి జాతకం’. ప్రియదర్శి, రూపా కొడువయూర్ హీరో హీరోయిన్లుగా నటించారు. ఈ సినిమా ఏప్రిల్ 25న రిలీజ్ కానుంది. ఈ సందర్భంగా నిర్మాత శివలెంక కృష్ణ ప్రసాద్ మీడియాతో ముచ్చటించారు. ఆయన చెప్పిన విశేషాలివే..
సారంగపాణి జాతకం అన్నీ అంశాలతో రూపొందిన సినిమా. యాక్షన్, సస్పెన్స్, కామెడీ, లవ్ ఇలా అన్ని ఉంటాయి. ఇంద్రగంటి గారు కథ చెప్పినప్పుడు నాకు చాలా ఆసక్తిగా అనిపించింది. థియేటర్‌లో ఆడియెన్స్ హాయిగా నవ్వుకునేలా ఉండే పూర్తి వినోదాత్మక సినిమా ఇది. ఇప్పటివరకు జంధ్యాల గారితో పూర్తి కామెడీ చేయలేకపోయిన లోటు ఈ సినిమాతో తీరినట్టు అనిపించింది. కొన్ని సినిమాలు ఎప్పటికీ గుర్తుంటాయి, ఈ సినిమా అలాంటిదే అవుతుంది.
జెంటిల్‌మన్, సమ్మోహనం తర్వాత మేమిద్దరం (ఇంద్రగంటి – హీరో కాంబో) కలిసి హ్యాట్రిక్ హిట్ కొట్టబోతున్నాం. కథ, కథనం అన్నీ బాగా వచ్చాయి. ఫ్యామిలీ ఆడియెన్స్‌తో పాటు యూత్‌కి కూడా నచ్చుతుంది. మంచి థియేటర్లు దొరకాలని కొద్దిగా వాయిదా వేసాం. ఇప్పుడు సమ్మర్ హాలిడేస్ స్టార్ట్ అయ్యాయి కాబట్టి, ఏప్రిల్ 25న రిలీజ్ చేస్తున్నాం.
సినిమా చూసినవాళ్లంతా చాలా బాగా ఉందన్నారు. ఫస్ట్ హాఫ్ ఫుల్ కామెడీగా ఉంటుంది. సెకండాఫ్ ఇంట్రెస్టింగ్‌గా, సస్పెన్స్‌ఫుల్‌గా ఉంటుంది. జాతకం చుట్టూ కథ తిరుగుతుంది కానీ ఎక్కడా బోర్ కొట్టకుండా ఉంటుంది.
ప్రతీ క్యారెక్టర్ కథలో భాగంగా సహజంగా వస్తుంది. ఎక్కడా రొటీన్ అనిపించదు. వెన్నెల కిషోర్, వైవా హర్ష, నరేష్, అవసరాల శ్రీనివాస్ అందరూ అద్భుతంగా నవ్విస్తారు.
ప్రియదర్శిని ఈ కథకి ఎక్స్‌లెంట్‌గా సెట్ అయ్యారు. కోర్ట్‌లో సీరియస్‌గా కనిపించిన ఆయన, ఈ సినిమాలో పక్కా కామెడీతో అలరిస్తారు. నటనతో న్యాయం చేశారు.
ఇంద్రగంటి గారి కామెడీ టైమింగ్‌కి గుర్తింపు వుంది. ఈ సినిమాతో ఆ హాస్యం నెక్ట్స్ లెవెల్‌కు వెళ్తుంది. పూర్తిగా పైసా వసూల్ సినిమా.
ఇప్పుడు ఇండస్ట్రీలో ఒక్కో హీరోకి నాలుగైదు ప్రాజెక్టులు లైన్‌లో ఉంటున్నాయి. కథకంటే కాంబినేషన్‌ల మీదే ఫోకస్ పెరిగింది. కానీ నాకు కథల పట్ల ప్యాషన్ ఎక్కువ. నేను తీసిన ఆదిత్య 369, జెంటిల్‌మన్, సమ్మోహనం, యశోద అన్నీ కూడా ఓ ప్రత్యేక గుర్తింపు తెచ్చాయి. సారంగపాణి జాతకం కూడా అదే రకంగా మంచి ప్రొడక్షన్ విలువలతో వచ్చింది.
ఈ సినిమాను జంధ్యాల గారి కామెడీ, ఈవీవీ గారి టచ్, ఇంద్రగంటి గారి మార్క్ కలిపి రూపొందించాం. అందరికీ నచ్చేలా, రీచ్ అయ్యేలా ప్లాన్ చేశాం. ఓవర్సీస్‌లో కూడా 220+ థియేటర్లలో గ్రాండ్ రిలీజ్ చేస్తున్నాం.
ఇంకా కొన్ని కథలపై చర్చలు జరుగుతున్నాయి. సీక్వెల్స్ అంటే నాకు భయం, అందుకే దూరంగా ఉంటాను. కానీ ఆదిత్య 369 సీక్వెల్ వస్తే తప్పకుండా చేయడానికి సిద్ధం. ‘యశోద’ డైరెక్టర్ల రెండు కథలు, పవన్ సాధినేని కథ, మళ్లీ ఇంద్రగంటి గారితో మరో సినిమా కూడా ప్లాన్‌లో ఉంది. అన్ని ఫైనల్ అయిన తర్వాత అధికారికంగా అనౌన్స్ చేస్తాను.
