కీర్తన ప్రొడక్షన్స్ పతాకంపై రూపొందిన ‘సముద్రుడు’ చిత్రం విడుదలకు రెడీ అయింది. నగేష్ నారదాసి దర్శకత్వంలో రూపొందిన ఈ చిత్రంలో రమాకాంత్, అవంతిక, భానుశ్రీ హీరో, హీరోయిన్లుగా నటించారు. భదావత్ కిషన్ నిర్మాతగా వ్యవహరించగా, సుమన్ కీలక పాత్రలో కనిపిస్తారు.
మత్యకారుల జీవితాలను కేంద్రంగా ఈ సినిమా తెరకెక్కింది. సముద్రమే వారి జీవనాధారం అయినప్పటికీ, ప్రభుత్వం విధించిన ఆంక్షల కారణంగా వారి జీవనం కష్టతరమవుతుంది. ఈ పరిస్థితుల్లో వారి పోరాటం, మనోవేదనలు ఈ చిత్రం ద్వారా ప్రేక్షకుల ముందుకు వస్తున్నాయి.
ఈ చిత్రంలో సుమన్ యాక్షన్ సీక్వెన్సులతో ప్రేక్షకులను అలరించనున్నారు. ఆయన పాత్ర చిత్రానికి హైలైట్‌గా నిలుస్తుందని చిత్ర యూనిట్ భావిస్తోంది. ఇందులో కామెడీ అంశాలు కథానుగుణంగా ఉంటాయి. సముద్రుడు చిత్రం ఈ నెల 25న ప్రేక్షకుల ముందుకు రానుంది.
నేడు ఫిల్మ్ ఛాంబర్‌లో చిత్ర యూనిట్ ట్రైలర్‌ను విడుదల చేసింది. ఈ కార్యక్రమంలో తలకోన ప్రొడ్యూసర్ శ్రీధర్ రెడ్డి, దర్శకుల సంఘం అధ్యక్షులు వీర శంకర్, డైరెక్టర్స్ సముద్ర, ప్రముఖ నిర్మాతలు రామ సత్యన్నారాయణ, ముత్యాల రాందాస్, పీపుల్ మీడియా ఎగిక్యూటివ్ ప్రొడ్యూసర్ కాసుల శ్రీధర్, చిత్ర కో ప్రొడ్యూసర్స్ జ్ఞానేశ్వర్, సొములు, చిత్ర నిర్మాత కీర్తన తదితరులు పాల్గొన్నారు.
