Mohanlal : కంప్లీట్ యాక్టర్ మోహన్‌లాల్‌ తన నటనతో ప్రేక్షకులను ఎప్పటికప్పుడు అలరిస్తూనే ఉన్నారు. తన నటనతో పాటు ఇప్పుడు దర్శకత్వంలోకి కూడా ప్రవేశిస్తున్నారు. ఈ నేపథ్యంలో ఆయన స్వీయ దర్శకత్వంలో రూపొందించిన చిత్రం ‘బరోజ్’. సోషియో ఫాంటసీ చిత్రంగా రూపొందుతున్న ఈ సినిమా ఈ ఏడాదే ప్రేక్షకుల ముందుకు రాబోతోంది.
‘బరోజ్: గార్డియన్‌ ఆఫ్ ది గామాస్ ట్రెజర్‌’ అనే నవల ఆధారంగా రూపొందిన బరోజ్ చిత్రం, పిల్లలను అలరించేలానే పెద్దలకు కూడా ఆనందాన్ని కలిగించేలా ఉంటుందని చిత్ర యూనిట్‌ తెలిపింది. మోహన్‌లాల్‌ ఈ చిత్రంలో ఒక వైవిధ్యమైన పాత్రలో కనిపించనున్నారు. ఆయన లుక్‌తో పాటు పాత్ర వైవిధ్యభరితంగా ఉంటుంది. ఇప్పటికే విడుదల అయిన పోస్టర్స్‌, టీజర్‌ సినిమాపై అంచనాలు పెంచాయి.
‘బరోజ్’ సినిమాను భారీ బడ్జెట్‌తో రూపొందించారు. ముఖ్యంగా గ్రాఫిక్స్‌పై ఎక్కువ శ్రద్ధ చూపించారు. పిల్లల సినిమా అయినా అద్భుతమైన ప్రపంచాన్ని ఈ సినిమాలో చూపించారు. షూటింగ్ పూర్తి చేసుకుని, పోస్ట్‌ ప్రొడక్షన్ వర్క్‌ సైతం పూర్తి అయిన బరోజ్ సినిమా విడుదల విషయంలో చాలా కాలంగా అనిశ్చితత నెలకొని ఉంది. అయితే, తాజాగా ఈ చిత్రం డిసెంబర్‌ 19న విడుదల కానున్నట్లు ప్రకటించారు. ఈ సినిమాను3డిలో కూడా విడుదల చేయబోతున్నారు.
