రామ్ కార్తీక్, కశ్వి జోడీగా నటిస్తున్న వెరైటీ చిత్రం ‘వీక్షణం’. కామెడీ, మిస్టరీ థ్రిల్లర్ కలయికతో ఈ సినిమా ఆకట్టుకోనుంది. పద్మనాభ సినీ ఆర్ట్స్ బ్యానర్‌పై నిర్మితమైన ఈ చిత్రానికి మనోజ్ పల్లేటి దర్శకత్వం వహించారు. ఈ సినిమా ఈ నెల 18న గ్రాండ్ గా రిలీజ్ కాబోతోంది. ఈ నేపథ్యంలో హైదరాబాద్‌లోని రామానాయుడు స్టూడియోలో ఈ చిత్రం ప్రీ రిలీజ్ ఈవెంట్ ఘనంగా జరిగింది. ఈ కార్యక్రమంలో చిత్ర యూనిట్ సభ్యులు, నటులు మరియు సినీ ప్రముఖులు పాల్గొన్నారు. ఈ సందర్భంగా చిత్ర యూనిట్ సభ్యులు తమ అభిప్రాయాలను తెలియజేశారు.
మా డైరెక్టర్ గారు నాకు మంచి స్క్రిప్ట్ ఇచ్చారు. మా సినిమా థ్రిల్లర్ జానర్‌లో సరికొత్త అనుభూతిని ఇస్తుంది అని హీరో రామ్ కార్తీక్ అన్నారు. మా టీమ్ ఎంతో కష్టపడి పనిచేసింది. ప్రేక్షకులు మా సినిమాను ఆదరిస్తారని నమ్ముతున్నాను అని దర్శకుడు మనోజ్ పల్లేటి తెలిపారు. వీక్షణం టీమ్‌తో కలిసి పనిచేయడం మంచి అనుభవం. ప్రేక్షకులు సినిమాను ఆదరిస్తారని ఆశిస్తున్నాను అని హీరోయిన్ కశ్వి అన్నారు.
హీరో, నేను మరియు షైనింగ్ ఫణి కలిసి చేసిన హంగామా ప్రేక్షకులను అలరిస్తుందని నటుడు శ్రీనివాస్ అన్నారు. మా డైరెక్టర్ గారు మా టీమ్‌ని బాగా ప్రోత్సహించారు. మేమంతా కలిసి కష్టపడి పనిచేశాం అని నటి బిందు తెలిపారు.
వీక్షణం సినిమాకు పనిచేయడం మంచి అనుభవం. విజువల్స్ అద్భుతంగా వచ్చాయని డీవోపీ సాయిరామ్ అన్నారు. సినిమా పాటలకు ప్రేక్షకుల నుండి లభిస్తున్న స్పందన చాలా ఆనందంగా ఉందని మ్యూజిక్ డైరెక్టర్ సమర్థ్ గొల్లపూడి అభిప్రాయ పడ్డారు. సినిమాలో నేను హీరోకు స్నేహితుడి పాత్రలో నటించాను. చాలా సరదాగా షూటింగ్ జరిగింది అని నటుడు షైనింగ్ ఫణి అన్నారు.
