Ramcharan : గ్లోబల్ స్టార్ రామ్ చరణ్. ప్రస్తుతం వరుస సినిమాలతో బిజీగా ఉన్నారు. శంకర్ దర్శకత్వంలో గేమ్ చేంజర్ సినిమాను రిలీజ్ కు రెడీ చేసిన రామ్ చరణ్ .. తదుపరిగా ఉప్పెన దర్శకుడు బుచ్చిబాబుతో కొత్త సినిమాను ప్రారంభించేందుకు సిద్ధమవుతున్నారు. ఈ కొత్త కాంబినేషన్‌పై అభిమానులు భారీగా ఆశలు పెట్టుకున్నారు.
బుచ్చిబాబు సినిమా తర్వాత, దర్శకుడు సుకుమార్‌తో కలిసి మరో భారీ ప్రాజెక్ట్ చేయడానికి రామ్ చరణ్ గ్రీన్ సిగ్నల్ ఇచ్చారు. సుకుమార్-చరణ్ కాంబినేషన్‌లో ఇంతకుముందు వచ్చిన ‘రంగస్థలం’ సినిమా ఎంతటి విజయం సాధించిందో మనందరికీ తెలుసు. ఈ కొత్త సినిమా కూడా అలాంటి విజయాన్ని అందుకుంటుందని అభిమానులు ఆశిస్తున్నారు.
ఇప్పుడు ఈ జాబితాలో మరో క్రేజీ కంబినేషన్ చేరింది. ‘కేజీఎఫ్’, ‘సలార్’ వంటి బ్లాక్‌బస్టర్‌లతో ప్రేక్షకులను అలరించిన దర్శకుడు ప్రశాంత్ నీల్‌తో కలిసి రామ్ చరణ్ కొత్త సినిమా చేయనున్నారు. ఈ ప్రాజెక్ట్‌ను ప్రముఖ నిర్మాత డీవీవీ దానయ్య నిర్మించనున్నారు. ప్రశాంత్ నీల్ దర్శకత్వం. రామ్ చరణ్ నటన ఈ సినిమాకు మరింత బలాన్ని చేకూర్చుతాయని భావిస్తున్నారు. ప్రశాంత్ నీల్ ప్రస్తుతం ఎన్టీఆర్‌తో కలిసి ఒక సినిమా చేస్తున్నారు. దీంతో పాటు ‘సలార్ 2’, ‘కేజీఎఫ్ 3’ వంటి భారీ ప్రాజెక్ట్స్ కూడా ఆయన చేతిలో ఉన్నాయి. ఈ సినిమాలన్నీ పూర్తి చేసిన తర్వాతే రామ్ చరణ్ ప్రాజెక్ట్‌కు శ్రీకారం చుట్టే అవకాశం ఉంది.
