Court movie : నేచురల్ స్టార్ , నిర్మాత అయిన నాని సమర్పణలో ప్రియదర్శి హీరోగా నటిస్తున్న కొత్త సినిమా ‘కోర్ట్’. ఈ చిత్రానికి శుక్రవారం శ్రీకారం చుట్టారు. ‘స్టేట్‌ వర్సెస్‌ ఎ నోబడీ’ అనే ఉపశీర్షికతో తెరకెక్కుతున్న ఈ చిత్రాన్ని ప్రశాంతి తిపిర్నేని నిర్మిస్తున్నారు. రామ్‌ జగదీశ్‌ దర్శకత్వంలో రూపొందుతున్న ఈ చిత్రం, అన్యాయంగా ఒక కేసులో ఇరికించబడిన ఓ యువకుడి కోసం జరిగే న్యాయ పోరాటాన్ని కథాంశంగా చేసుకుంది.
శుక్రవారం జరిగిన పూజా కార్యక్రమంలో నాని ముహూర్తపు సన్నివేశానికి క్లాప్‌ కొట్టగా, ప్రశాంతి కెమెరా స్విచ్చాన్‌ చేశారు. జెమిని కిరణ్‌ గౌరవ దర్శకత్వం వహించారు. ఈ చిత్రంలో ప్రియదర్శి ఓ న్యాయవాదిగా కనిపించనున్నారు. సెప్టెంబరు నుంచి రెగ్యులర్‌ చిత్రీకరణ మొదలవుతుందని చిత్ర బృందం తెలిపింది.
‘అ!’, ‘హిట్‌’ సిరీస్‌ లాంటి సూపర్‌హిట్ చిత్రాలతో నిర్మాతగా మంచి గుర్తింపు తెచ్చుకున్న నాని, తన సొంత నిర్మాణ సంస్థ వాల్‌ పోస్టర్‌ సినిమాస్‌ ద్వారా ‘కోర్ట్’ సినిమాను సమర్పిస్తున్నారు. ఈ సినిమా కూడా ప్రేక్షకులను అలరించడమే కాకుండా, సమాజంలోని కొన్ని కీలక అంశాలపై చర్చకు తావిస్తుందని ఆశిస్తున్నారు.
