Nayanasarika : తెలుగు చలనచిత్ర పరిశ్రమలో తాజా సెన్సేషన్‌గా మారిన నటి నయన్ సారిక. తొలి చిత్రం ‘ఆయ్’ విడుదలైనప్పటి నుంచి అందరి దృష్టిని ఆకర్షిస్తోంది. ఆగస్ట్ 15న విడుదలైన ఈ చిత్రం అన్ని వర్గాల ప్రేక్షకులను అలరించి భారీ విజయాన్ని సాధించడంతో నయన్ సంతోషానికి అవధులు లేవు. యన్టీఆర్ బావమరిది నార్నే నితిన్‌కు జోడీగా నటించిన నయన్ సారిక, పల్లవి పాత్ర ద్వారా ప్రేక్షకుల హృదయాలను దోచుకుంది. ఆమె నటన, అందం ప్రేక్షకులను బాగా ఆకట్టుకున్నాయి. ఈ విజయానికి తెలుగు ప్రేక్షకులకు నయన్ తన హృదయపూర్వక కృతజ్ఞతలు తెలిపింది.
“తెలుగు ప్రేక్షకులు మా సినిమాను ఇంత గొప్పగా ఆదరించినందుకు ధన్యవాదాలు. టాలీవుడ్‌లో ఒక మంచి విజయంతో నా ప్రయాణం ప్రారంభం కావటం నాకెంతో సంతోషిస్తుంది. ‘ఆయ్’ సినిమా సక్సెస్ వ్యక్తిగతంగా ఎంతో సంతోషాన్నిస్తోంది. ఇంత మంచి సినిమాలో నన్ను భాగం చేసిన గీతా ఆర్ట్స్ సంస్థకు, దర్శకుడు అంజి కె. మణిపుత్రకు ప్రత్యేకంగా కృతజ్ఞతలు తెలియజేసుకుంటున్నాను” అని నయన్ సారిక తెలిపింది. స్కూల్, కాలేజీల్లో డ్రామాల్లో నటించి నటనపై మక్కువ పెంచుకున్న నయన్, హీరోయిన్ కావాలనే కలను ‘ఆయ్’ సినిమా ద్వారా సాకారం చేసుకుంది. “ఆయ్’ సినిమా షూటింగ్ ప్రారంభం కావటానికి ముందు నేను, నితిన్ కలిసి రిహార్సల్స్, వర్క్‌షాప్స్‌లో పాల్గొన్నాం. తెలుగు కోసం ప్రత్యేకమైన శిక్షణను ఇచ్చాం. నా టీమ్ సభ్యులు కూడా నాకెంతో సపోర్ట్ చేశారు” అని ఆమె తెలిపింది.
డిగ్రీ చదువుతుండగానే నటిగా అవకాశం వచ్చినప్పటికీ, చదువును ఆశ్రద్ధ చేయకుండా డిగ్రీని పూర్తి చేయాలని నిర్ణయించుకుంది. “ఆయ్’ సినిమా షూటింగ్‌లో పాల్గొంటూనే ఫైనల్ ఇయర్ డిగ్రీ ఎగ్జామ్స్‌కు ప్రిపేర్ అయ్యింది. షూటింగ్‌కి నేను బుక్స్, స్టడీ మెటీరియల్ తీసుకెళ్లేదాన్ని. డిగ్రీ ఫైనల్ ఇయర్ ఎగ్జామ్స్ పూర్తి చేయటానికి నేను క్యారీవ్యాన్‌లో షూటింగ్ గ్యాప్‌లో చదువుకుంటుండేదాన్ని. ఓ వైపు షూటింగ్, మరో వైపు పరీక్షల కోసం ప్రిపేర్ కావటం అనేది చాలా ఛాలెంజింగ్‌గా అనిపించింది” అని షూటింగ్ రోజులను గుర్తు చేసుకుంది నయన్.
‘ఆయ్’ సినిమా బ్లాక్ బస్టర్ విజయాన్ని సాధించిన తర్వాత చిత్ర యూనిట్ సభ్యులు ప్రత్యేకంగా అల్లు అర్జున్, ఎన్టీఆర్‌లను కలిసి సినిమా సక్సెస్‌పై అభినందనలు కురిపించారు. ఇద్దరు స్టార్ హీరోలు నయన్ సారిక నటనను ప్రశంసించారు. “సినిమాలో చాలా ఈజ్‌తో నా క్యారెక్టర్‌లో నటించానని ఎన్టీఆర్‌గారు అభినందించారు. అల్లు అర్జున్‌గారైతే నన్ను దక్షిణాది అమ్మాయి అనే అనుకున్నారు. కాదని తెలిసి అంత చక్కగా పాత్రలో ఒదిగిపోయినందుకు ఆశ్చర్యపోయారు. కళ్లతో చక్కగా హావ‌భావాల‌ను ప‌లికిస్తాన‌ని అల్లు అర‌వింద్‌గారు ప్రశంసించారు. అంత పెద్ద స్టార్స్ నుంచి ప్రశంస‌లు రావ‌టం నాకెంతో గొప్పగా అనిపించింది” అని సంతోషాన్ని వ్యక్తం చేసింది నయన్ సారిక.
