Vijay sethupathi : తమిళ మక్కళ్ సెల్వన్ విజయ్ సేతుపతి రీసెంట్ గా ‘మహారాజ’ సినిమాతో సోలో హీరోగా తెలుగు ప్రేక్షకుల హృదయాలను దోచుకున్నాడు. ఈ సినిమా సక్సెస్ తో తన కెరీర్‌ను మరోసారి శిఖరానికి చేర్చాడు. థియేటర్స్ లోనే కాదు .. ఓటీటీలో సైతం ఈ చిత్రం సృష్టించిన సంచలనం ఇప్పటికీ తగ్గలేదు.
ఇప్పుడు.. విజయ్ సేతుపతి తన అభిమానులను మరోసారి అలరించేందుకు సిద్ధమవుతున్నాడు. తమిళ సినిమా పరిశ్రమలో విలక్షణమైన కథలకు పేరుగాంచిన మిస్కిన్ దర్శకత్వంలో ‘ట్రైన్’ అనే చిత్రంలో నటిస్తున్నాడు. మిస్కిన్ ఇంతకు ముందు ‘చిత్తిరం పేసిదడి, నందలాల, యుద్ధం సెయ్, తుప్పరివాలన్, సైకో’ వంటి చిత్రాలతో ప్రేక్షకులను అలరించిన విషయం తెలిసిందే.
‘ట్రైన్’ చిత్రంలో విజయ్ సేతుపతి ఓ విభిన్నమైన పాత్రలో కనిపించనున్నారు. సినిమా కథ అంతా ఒక రైలులోనే నడిచేలా ఉంటుందని తెలుస్తోంది. సేతుపతి బాగా గడ్డం పెంచి చిత్రమైన లుక్‌లో కనిపిస్తున్నారు. ఈ చిత్రంలో శ్రుతి హాసన్ కూడా ఒక కీలక పాత్ర పోషిస్తున్నారు. మిస్కిన్ లాంటి ప్రతిభావంతుడైన దర్శకుడు, సేతుపతి లాంటి మేటి నటుడు కలిసి చేస్తున్న ఈ చిత్రంపై ప్రేక్షకుల్లో ఎంతో ఆసక్తి నెలకొంది.
